Nu četru dzeivuotuoju dasaceitūs kandidātu itūgod Leivuona nūvoda augstuokū apbolvuojumu Leivuona Gūda piļsūņs 2016 pīškiers Leivuona Sv. Mikeļa Erceņgeļa Rūmys katuoļu draudzis prīsteram Juram Zarānam.

Apbolvuojums pīškierts par naatlaideibu i īlyktū dorbu Leivuona katuoļu bazneicys atjaunuošonā, sabīdreibys goreiguos izaugsmis veicynuošonu, izgleitojūšū dorbu goreigajā jūmā, par izcileibu ticeibys sludynuošonā i ticeibys izaugsmē i īmontuotū cylvāku atsauceibu i cīnu.

Dasacejuma viestulē, kuru parakstejuši 108 Leivuona nūvoda dzeivuotuoji, saceits: “Prīsters Jurs Zarāns ir myusu nūvodnīks i nu 2012. goda – Leivuona draudzis pravests. Četru godu laikā, pošaizlīdzeigai struodojūt, padareits īvāruojams dorbs i goreiguos dzeivis, i bazneicys atjaunuošonā.

2012. – 2013. godā katuoļu bazneicā īreikuota apskaņuošonys sistema i īguoduoti proceseju tārpi. 2013. – 2014. godā nūmaineits bazneicys jumts, lūgi, durovys, veikts bazneicys īšktelpu remonts, īreikuota apsyldamuo greida, lobīreiceibys, bārnu styureits. 2014. – 2015. godā veikta vargaņu restauraceja, atjaunuots bazneicys interjers – sūli, oltori i cyti interjera elementi. 2015. – 2016. godā piļneibā nu jauna izcalta katuoļu draudzis sāta, vys vēļ turpynojās apleicīnis lobīkuortuošona. Īlykts lels dorbs, rokstūt projektus, pīsaistūt zīduojumus i realizejūt byuvnīceibys īceris. Itūšaļt ir nūdūms atjaunuot Leivuona katuoļu bazneicys zvonu tūrni ar treis zvonim tuo viesturiskajā augstumā, kaids tys beja da I Pasauļa kara.

Pravesta saceituos kasnedelis muoceibys nikod nav pavirši voi vierspusieji sagataveiti. Jis vysod aicynoj dūmuot, analizēt, augt goreigajā atteisteibā i naapsastuot pi sasnāgtuo. Kab aktivizātu sabīdreibu, katuoļu draudze organizej vosorys nūmetnis bārnim, goreiguos muzykys koncertus, lobdareibys akcejis leidzcylvāku atbolstam – tys vyss devs nūpītnu īguļdejumu Leivuona sabīdreibys salīdiešonā i goreigajā atdzimšonā. Pravests ar sovu energeju, uzjiemeibu i naatlaideibu ir pīmārs jaunajai paaudzei.”

Apbolvuojums tiks padūts Leivuona piļsātys svātku laikā Tradiceju laukumā – sastdiņ, 16. julī 19.30. Gūda piļsūņam ar Leivuona nūvoda dūmis lāmumu pīškierta naudys bolva 500 eiro apmārā i pīminis veļte – sudobra Gūda piļsūņa nūzeimeite.