20. augustā bīdreiba “Kroma kolna bruoliste” aicynoj iz kasgadejim svātkim pošu caltajā kūka pilī Dagdys nūvoda Ondrupinis pogosta Zundūs, informej bīdreibys puorstuove Evija Maļkeviča. Svātku laikā sevkurs aicynuots izzynuot senejūs latgaļu dzeivisveidu, omotus i prasmis, kai ari pīsadaleit tematiskuos vydslaiku aktivitatēs.

Itūgod svātkūs varēs satikt vydslaiku ceineituojus i puorstuovus nu taidu Latvejis viesturis rekonstrukcejis i ceiņu klubu kai “Vairogs”, “Exercitus Rigensis”, “Heiligenberg”, “Robeža”, “Vilkači”, “Rodenpoys”, kai ari nu Lītovys ceiņu klubu “Varingis”, “Simkala” i Boltkrīvejis viesturis rekonstrukcejis kluba “Vargertoron”.

Apmaklātuojim karaveiru apmetne i piļs vuorti byus attaiseiti jau nu 12 stuņžu. Pa dīnu apmaklātuoji aicynuoti apmeklēt tematiskuos omotu i prasmu darbneicys, kai ari īsasaisteit apmaklātuoju turnirā, izmontojūt treneņu zūbynus. Svātkūs byus vareiba paraudzeit saut ar lūku kūpā ar “V&M Archery”, veiduot muolu ar “Malny Wykly”, vuiceitīs tuošu pynumu, īpazeit kaļva omotu, kai ari cytys senejuos prasmis kūpā ar vītejim meistarim, Ludzys omotnīku centra puorstuovim i omotnīkim nu Boltkrīvejis. Ar muzyku svātkus boguotynuos tyvuokys i tuoluokys folklorys kūpys.

Svātku atkluošona planavuota 15.00, sovukuort nu 16.00 apmaklātuoji eipaši aicynuoti sekuot leidza ceineituoju turniram, kuruo laikā Kroma kolna bruolistis i gostu klubu izvierzeitī karaveiri ceineisīs par veiksmeiguokuo ceineituoja titulu i duorgumu skreini. Kroma kolna svātku kulminacejā 21.00 nūtiks senejūs ciļšu ceiņa pi kūka piļs, kai ari tiks aizdadzynuotys svātku guņs skulpturys.

Kroma kolna piļs svātkus reikoj Kroma kolna bruoliste sadarbeibā ar vītejim omotnīkim, lobvielim i ar Dagdys nūvoda dūmis atbolstu. Pasuokumā eipaši aicynuotys pīsadaleit saimis ar bārnim, kab veicynuotu jaunuos paaudzis iņteresi par viesturi i tuos izziņu. Īīšona bez moksys.

Svātkim vys vēļ aicynuoti dasasaceit senejūs omotu i prasmu popularizātuoji, viesturis rekonstruktoru klubi i viesturis entuziasti, kai ari sātys ražuotuoji i tematiski atbylstūši tierguotuoji.