Rēzeknis nūvoda vokaluo studeja “Skonai” aicynoj iz sovu pīcu godu jubileja koncertu “Sasatikšonuos”, kas nūtiks 21. decembrī 18.00 Rēzeknis nūvoda pošvaļdeibys lelajā zalā, informej “Skonai” dalineica Aiva Streļča.

“Skonai” bārni i jaunīši klauseituojus prīcynuos i ar zynomom kompozicejom, i kū pavysam jaunu. Kluotyn muzykaluom svineibom tiks prezentāti div vokaluos studejis muokslinīciskuos vadeituojis Guntrys Kuzminys-Juknys sirdsdorba augli – dzīšmu kruojums “Sirdsgunteņa”, kurā byus atrūnamys Guntrys originalkompozicejis ar latgalīšu autoru tekstim i latgalīšu tautysdzīšmu apdaris dažaida leluma muzykalajim sastuovim, i bārnu dzīšmu CD “Rūtaļa”, kas veļteits dzejnīka Ontona Slišāna pīmiņai i īraksteits kūpā ar “Skonai” mozuokajim dzīduotuojim.