Fotografs i Latgolys fotografu bīdreibys dybynuotuojs Igors Pličs publiciejs aicynuojumu atsasaukt vysus, kurim ir kaida informaceja par Latgolys fotografim.

“Jiusu arhivūs nūteikti ir vacys fotokartenis, iz kurom ir radzami fotografu zeimūgi i cytys zeimis, kurys aplīcynoj autora dorbu. Mes, profesors Henrihs Soms, viesturnīks Pīters Korsaks i es Igors Pličs, Latgolys fotografu bīdreibys dybynuotuojs, vuocam materialus par fotografu darbeibys viesturi Latgolā,” socialuo teikla Facebook.com kontā “Latgales fotogrāfu vēsture” roksta I. Pličs.

Sovulaik Latgolā ir bejs gona daudz fotografu, pietnīku mierkis ir izdūt enciklopedeju par Latgolys fotografu darbeibys viesturi, dzeivis aprokstim i fotografu biļdem. Pietnīki aicynoj īsyuteit vysys pīejamuos zinis par fotografim – kur dorbuojīs, vuordu, pavuordi, tāva vuordu, dzimšonys i mieršonys datus, vītu, pi kuo vuiceijīs fotografa omotu i sevkuru cytu nūdereigu informaceju. Informaceju aicynoj syuteit iz e-posta adresi lauraplus@inbox.lv ci sasazynuot telefoniski +371 29121689 (Igors Pličs).

Karteņa: Pītera Korsaka arhivs