Rokstu sagataveja: portals lakuga.lv

Latgolys Kongresa godadīnys mienesi īsuocūt, grupa “Bez PVN” prezentej video dzīsmei “Nabyus baiss(t)”. Dzīsme pyrmatskaņuojumu pīdzeivuoja šudiņ radejā “Star FM”, informej grupys daleibnīks Guntis Rasims.

Dzīsmis muzykys i vuordu autors ir Kristaps Rasims, jei īraksteita studejuos “Hodila Records” i “Reiga”, dzīsmi miksēja Krišjānis Geidāns, masterēja Kaspars Ansons. Par pyušamūs instrumentu īspēlem paļdis Denisam Smirnovam.

Video operators ir Ivars Utināns, kusteibu horeografs – Ilmārs Dreļs. Grupa soka paļdis Diānai Zirniņai i “GORS” komandai, Romānam Ivanovam i JIMV pyutieju orkestram i N. Draudzinis vydsškolys kolektivam.

Par dzīsmis ideju teksta autors soka: “Mums kotram ir juopuorvar sovi dzeivis lada kolni, kas aizsoluši stuov prīškā kasdīnys rutinā. Tūmār leluokais lada kolns esi tu pats sev. Myusu bailis ir tuos, kas mums aiztaisa ceļus, pa kurim mes varātu augt. Vajaga sapņuot – sapņuot ar vierīni, nasabeit dareit lelys lītys i svīstīs nazynomajā. Kotrys myusu padareitais dorbs i vuords maina pasauli. I tys ir viņ myusu pošu rūkuos, iz kuru pusi mes jū maineisim! Nasabeist – dori!”

Grupā “Bez PVN” dorbojās – Kristaps Rasims (bolss, bandžo), Guntis Rasims (bolss, akordeons), Juris Vucāns (bolss, elektriskuo gitara, samplers), Valdis Vucāns (basgitara) i Normans Bārbals (bungys).

“Bez PVN” sajāmuši vairuokys latgalīšu kulturys goda bolvys “Boņuks”, tūs vydā ari itūgod “Boņuks 2018”.

Ituo gods 26. oktobrī Latgolys koncertzalā “GORS” grupa aicynoj iz lelkoncertu “Rūbeži”.