Rokstu sagataveja: portals lakuga.lv

Latgola nu seneju dīnu īmontuojuse Latvejis vīsmīleiguokuo regiona statusu. Par vīnu nu regiona kulinaruo montuojuma simbolim palics styprais alkoholiskais dzierīņs šmakovka. Šmakovkys muzejs izveiduojs video stuostu par ituo dzierīņa ceļu Latgolā. Video prezentaceja nūtiks 23. oktobrī 18.00 stuņdēs Šmakovkys muzejā Daugovpilī. Pēc video prezentacejis 18.30 stuņdēs gaidoma šmakovkys darynuošonys meistarklase, informej muzeja puorstuovs Viktors Andruškevičs.

“Latgolā dorbojās nazcik uzjiemieju, kuri oficiali nūsadorboj ar sātā ražuotuo stypruo alkoholiskuo dzierīņa – šmakovkys ražuošonu. Sevkuram itam uzjāmumam ir sova miseja, sova koncepceja, kas jūs padora naatkuortuojamus i autentiskus, kas kūpumā papyldynoj pīduovuojumu kluostu i paaugstynoj Latgolys regiona turisma potenciala konkurētspieju,” stuosta V. Andruškevičs.

Reklamys video “Šmakovkys ceļš Latgolā” veiduots projekta ītvorūs, kur vīnkūpus teik apkūpuoti vysi leluokī Latgolys kulinaruo montuojuma popularizātuoji i tradicionaluo dzierīņa ražuotuoji.

Projekta mierķs ir veicynuot Daugovpiļs, Latgolys īdzeivuotuoju, kai ari turistu interesi par Latgolys kulinarū i regiona namaterialū kulturys montuojumu.

“Juopīzeist, ka alkohols vysod ir bejuse naskaitomim stereotipim apveita tēma. Kab lauztu itūs stereotipus, i radeitu objektivu prīškstotu par šmakovkys dzierīni kai naatjamamu Latgolys kulinaruo montuojuma i regiona namaterialuo kulturys montuojuma sastuovdaļu, vajadzeigs veikt izgleitojūšys aktivitatis, ar kuru paleidzeibu sabīdreiba giutu plašuoku informaceju na viņ par puormiereigys alkohola lītuošonys nagativajom sekom, bet ari izprostu šmakovkys dzierīņa lūmu Latgolys regiona tradicejuos i kulinarajā montuojumā,” pastreipoj Andruškevičs.

Izveiduotais reklamys video tiks izmontuots Šmakovkys muzejā, z/s “Sēlija”, Latgolys šmakovkys dadzynuotovā Malnovā, “Šmakoukas muzejs” Gaigalovā, “Šmakovkas labaratorija” Silenē i Latgolys kulinaruo montuojuma atpazeistameibys veicynuošonai.
Video izveiduots nazcik volūduos – latgalīšu, latvīšu, krīvu, angļu i lītuvīšu.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.