Rokstu sagataveja: portals lakuga.lv

Pārnejuo goda gols i ituo īsuokums latgaliskajā kulturā ir cīši aktivs – tū ituos nedelis īsacejumūs vēļreiz izsver rakstneica, literaturzynuotneica i “Valodu māja” projektu vadeituoja Elīna Kokareviča, kurei ir ari tikū izdūtuo Marejis Dzeislys dzejis kruojuma “Vysta smierts” projekta vadeituoja.  

“Dzeiveiba” radejis skaitejumi

Svaigi i kulturvidis dažaiduošonai i dažaideibys paruodeišonai tik cīši vajadzeigi – Ilzis Spergys stuostu skaitejumi nu kruojuma “Dzeiveiba” radejis teatrī. Tys ir nūzeimeigai na tik kai unikala nūtikšona – pyrmū reizi radejā izskanēja skaitejumi latgaliski –, bet ari partū, ka paruodeja, ka Latvejā ir vaira nakai tik vīna div bolsi, kas pīmāruoti itaidim skaitejumim. Ceru iz prīšku radejis teatrī vys bīžuok dzierdēt kai dažaidys jaunuokuos literaturys skaitejumus, tai jaunus bolsus, kurūs grybātūs klauseitīs.

Marejis Dzeislys dzeislinīks

Pārnejuo goda gols beja boguots ar nūtikšonom latgalīšu literaturā, kū ir vārts atzeimēt i svinēt. Izguoja Oskara Seiksta dzejis i eisprozys kruojums “Vokora vuordi draugim”, Inetys Atpilis-Juganis dzejūļu kruojums “Spuornu golu šolks”, Ilzis Spergys, Kristapa Rasima i Līgys Romančukys kūpdorbs – dzīšmu i dzejūļu kruojums bārnim “Vuškeņa iz pļovys”, nūtyka Latgolys prozys skaitejumi, kur varēja dzierdēt aktualū prozu latgalīšu volūdā. Pošuos goda beiguos “Valodu māja” izdeve ari eistyn naparostu gruomotu – nūslāpumainuo autora Marijis Dzeislys dzeislinīku “Vysta smierts”, kū gribīs atzeimēt na tik subjektivu īmesļu deļ kai projekta vadeituojai, tok ari partū, ka, dūmoju, itys ir vīns nu spieceiguokūs dzejūļu kruojumu latvīšu literaturā beidzamajūs godūs. 

Nūviertēt latgaliskū i pošim īsasaisteit

Divejis īspiejis, kai sasajust īdareigam, nūviertēt leidzbīdrus i īsasaisteit: leidz 10. janvaram īspiejams dasaceit pretendentus Latgalīšu kulturys goda bolvai “Boņuks 2021” i leidz 31. janvaram dasaceit referatus Latgolys kongresam, kuruo vierstema ir “Latgaliskums Eiropā: nu volūdys da ekonomikai”. Īsokom i pīsadolom!