Rokstu sagataveja: portals lakuga.lv

Sastdiņ, 17. septembrī, Bolvu nūvoda Upītē jau 21. reizi izskanēs vacuokais latgalīšu festivals – mīlesteibys aiļu i dzīšmu festivals “Upītes Uobeļduorzs”. Bez festivala vēļ arviņ nav īsadūmojams septembris Zīmeļlatgolā. Itūgod festivalu vadeis muokslineica, literate i školuotuoja Evika Muizniece, bet kai eipašī gosti byus grupa “Pirmais Kurss”.

Festivala dalinīku vydā itūgods byus “Dabasu durovys”, “Latgalīšu Reps”, “Unknown Artist”,  folklorys kūpa “Upīte”, “Bulta”, “Reibums”, “Kei-Rei”, “Piparmētra”, bet literatus puorstuovēs Anna Rancāne, Valentins Lukaševičs, Annele Slišāne, Ineta Atpile-Jugane, Mārīte Slišāne, Gunta Ločmele, Dagneja, Juoņs Ryučāns i Līga Rundāne.

“Upītes Uobeļduorzs” ir vīneigais festivals, kurs namaineigi kotru godu puļcej latgalīšu literatus i muziķus, īpazeistynojūt kai ar jaunim vuordim latgalīšu kulturā, tai aicynojūt latgalīšu muzyku i literaturu atkluot kotram interesentam. Naiztryukstūša festivala tradiceja ir ari kaids eipašais gosts – ite bejs i muzikis Renārs Kaupers, i aktrise Zane Jančevska, dzīsminīks Kārlis Kazāks, grupa “Inokentijs Mārpls”, “Gain Fast”, “Linga”, “100. debija”, Katrīna Dimanta, kai ari cyti, bet itūgod festivala eipašī gosti byus grupa “Pirmais Kurss”, kuri pasūlejuši festivala apmaklātuojus īprīcynuot ari ar kaidu dzīsmi latgaliski.

Meilys aiļu i dzīšmu festivala “Upītes Uobeļduorzs”, kas nūtiks 17. septembrī sešuos stuņdēs vokora Upītis zalta spīgeļu estradē, suokums vaicojams 2002. godā, i tys ir vacuokais da ituo nūteikūšais latgalīšu festivals pasaulī. Pasuokuma idejis autors ir latgalīšu literats, nūvodpietnīks Ontons Slišāns, kurš sovulaik īsadūmuoja sataiseit sovpateigu Dzejis dīnom veļteitu festivalu, kab popularizēt i saglobuot latgalīšu volūdu. Itūšaļt festivala organiziešonu turpynoj Ontona dāls Andris Slišāns ar saimi, saglobojūt festivalu kai kasgadeju sasatikšonys reizi, kurā skaņ latgalīšu volūda.

Festivala reikuotuojs, Namaterialuos kulturys montuojuma centra “Upīte” direktors Andris Slišāns, gaidūt festivalu, soka: “Prīca, ka piec dažu godu puortraukuma dzejnīku vydā festivalā atsagrīž ari dzejnīki-veirīši, bet ar vadeituoju byus taišni ūtraiž – da ituo festivalu vysod vadejuši veirīši, bet itūgod “Upītes Uobeļduorzu” vadeis multimuokslineica Evika Muizniece.”

Festivala īejis beleti pyrma nūtikšonys var nūpierkt bezrindas.lv, beleta cena 8,50 €. Festivalā iz vītys beleta cena byus 10,00 €. “Upītes Uobeļduorzs” reikuotuojs ir Namaterialuos kulturys montuojuma centrs “Upīte”, bet festivala nūtikšonu atbolsta Vaļsts kulturkapitala fonds i Latvejis Nacionalais kulturys centrs.