Rokstu sagataveja: portals lakuga.lv

Latvejis Nacionalais kulturys centrs aicynoj pīsasaceit dorbam Namaterialuo kulturys montuojuma (NKM) padūmē puorstuovus nu navaļstiskūs organizaceju, kurūs darbeibys mierkis saisteits ar namaterialuo kulturys montuojuma saglobuošonu i kas dorbojās Kūrzemē, Latgolā, Sielejā, Vydzemē, Zemgalē i Reigā, informej centra puorstuove Linda Ertmane.

NKM padūme izviertej pīsacejumus namaterialuo kulturys montuojuma elementu īkļaušonai Nacionalajā namaterialuo kulturys montuojuma sarokstā, kai ari snādz atzynumus kulturys ministram i Latvejis Nacionalajam kulturys centram par Namaterialuo kulturys montuojuma saglobuošonys planu i normativūs aktu projektim namaterialuo kulturys montuojuma jūmā. NKM padūmis lūcekli padūmē dorbojās bez atleidzeibys.

2016. godā pījimtais Namaterialuo kulturys montuojuma lykums paradz, ka padūmis sastuovā ir pīci namaterialuo kulturys montuojuma jūmys specialisti, kurūs delegej Kulturys ministreja, Izgleiteibys i zynuotnis ministreja, Vidis aizsardzeibys i regionaluos atteisteibys ministreja, UNESCO Latvejis Nacionaluo komiseja i Latvejis Pošvaļdeibu savīneiba, četri kulturys ministra paaicynuoti zynuotnīki voi augstškolu akademiskuo personala puorstuovi, kurūs zynuotniskuo voi akademiskuo darbeiba ir saisteita ar namaterialuo kulturys montuojuma saglobuošonu, kai ari pīci kulturys ministra paaicynuoti puorstuovi nu navaļstiskūs organizaceju, kurūs darbebys mierkis saisteits ar namaterialuo kulturys montuojuma saglobuošonu i kuruos dorbojās Kūrzemē, Latgolā, Vydzemē, Zemgalē i Reigā.

Jemūt vārā Latvīšu viesturiskūs zemu lykuma 2. panta pyrmajā daļā nūsaceitū piļsātu i pogostu pīdereibu latvīšu viesturiskajom zemem, i saskaņā ar Kulturys Ministrejis 2022. gods junī izdūtū Namaterialuo kulturys montuojuma padūmis nūlykumu, padūmis sastuovā papyldus teik īkļauts vīns puorstuovs nu navaļstiskuos organizacejis, kura dorbojās Sielejā.

Pretendentam juoīsnādz lāmuma nūroksts voi protokola izroksts par puorstuova izvierzeišonu, rakstiska personys pīkrisšona byut par padūmis lūcekli; personys dzeivisguojuma aproksts (CV) par pīredzi namaterialuo kulturys montuojuma jūmā i navaļstiskuos organizacejis statutu kopija.

Pīsacejumi īsnādzami leidz 15. martam elektroniski: lnkc@lnkc.gov.lv (ar drūsu elektroniskū parokstu), kai ari personiski voi pa postu: Latvijas Nacionālais kultūras centrs, Zigfrīda Annas Meierovica bulvāris 14 – 7, Rīga LV 1050.