Rokstu sagataveja: portals lakuga.lv

Šudiņ, 6. junī, ar pīsacejuma izstuodis atkluošonu Daugovpilī suocās kasgadejais storptautyskais keramikys muokslys simpozejs “CERAMIC LABORATORY”, kas puļcej muokslinīkus kai nu Latvejis, tai Izraelys, Indejis, Dīnavydkorejis i cytu vaļstu, informej Rotko centra puorstuovi.

Simpozejs “CERAMIC LABORATORY” Daugovpilī nūtiks jau vīnpadsmytū reizi. Beidzamajūs godūs ir izaveiduojuse tradiceja simpozeju aizsuokt ar izstuodi, paruodūt muokslinīku personeigajuos studejuos voi darbneicuos radeitūs dorbus i ļaunūt interesentim īpasazeit ar daleibnīku daiļradi jau pošuos simpozeja suokuos.

Itūgod simpozeja i ari tuo pīsacejuma izstuodis daleibnīku pulkā ir muokslinīki Šamajs Sems Gibšs (Shamai Sam Gibsh) (Izraela), Karina Puča-Grasi (Karin Putsch-Grassi) (Itāleja), Kens Jutdanajs Sripaibūns (Ken Yutdanai Sripaiboon) (Taizeme), Anna Nurga (Ann Nurga) (Igauneja), Čonhuns Juns (Junghoon Yoon) (Dīnavydkoreja), Adils Raiters (Adil Writer) (Indeja), Una Gura (Latveja), Lilija Zeiļa (Latveja), Ilona Abdulajeva (Latveja), Kristīne Nicmane (Latveja), Nellija Dzalba (Latveja).

Keramikys simpozeju reikoj Latvejis Laikmeteiguos keramikys centrs sadarbeibā ar Daugovpiļs Marka Rotko muokslys centru. Pīsacejuma izstuode apmaklātuojim daīmama uora stykla vitrinā aba galerejā “4METRI”, kas atsarūn sūpluok Latvejis Laikmeteiguos keramikys centram Daugovpiļs cītūksnī, Hospitaļa īlā 8.

Pīsacejuma izstuode Daugovpiļs cītūksnī byus apsaverama vysu vosoru. Sovpus keramikys simpozejs ilgs da 21. juņa i nūsaslēgs ar tuo laikā radeitu jaundorbu izstuodis atkluošonu Daugovpiļs Marka Rotko muokslys centrā. Īīšona pasuokumūs – bez moksys.