Rokstu sagataveja: portals lakuga.lv

Ir suocīs zaltainuo rudiņa laiks i itūnedeļ ar sovim kulturys īsacejumim doluos izaugsmis i Latgolys izzynuošonys programys “LTG tu dū!” dalineica i Preiļu nūvoda Turysma informacejis centra puorstuove Marta Mičule.

Ej uorā i īelpoj zalta rudiņi, cikom vēļ ir sylts

Pi myusu Latgolā ir cīši skaista doba, ka navajag pat braukt iz Siguldu, kab redzēt rudiņa puorvierteibys. Ka gribīs izīt voi izbraukt tuoļuok par sovys dzeraunis rūbežim, tod dūdīs apmeklēt vysaiduokys dobys stygys voi skotu tūrņus Latgolā. Dūdīs puorguojīnī pa Teirumnīku pūra stygu, iz Viļakys azara solu voi, ka interesej viesture, dūdīs iz Stompaku pūra stygu, kab lobuok īpazeit partizanu dzeivi 2. pasauļa kara laikā i piec tuo. Taipat īsoku apmeklēt ari skotu tūrņus, nu kurūs pasaver breineigs skots – Salmeja azara skotu tūrni, Vasargelišku skotu tūrni voi kaidu cytu, sirdei tyvuoku. Tys ir eistais laiks, kab dūtūs izbraucīnī – guļbys jau nūroktys, bet lopys vēļ nav juokaš.

Rudiņa atlaižu nedeļa Latgolys viestnīceibys “Gors” reikuotajim pasuokumim

Rudinī palīk vaira laika, lai apmaklātu kulturys pasuokumus, jo vosorā reizem tū navar īspēt – piļsātys svātku, atvalinuojumu i duorza dorbu karuselī tam eisti naatlīk laika. Tok niu Latgolys viestnīceiba “Gors” sovim apmaklātuojim pīduovoj īspieju īsaguoduot beletus iz jūs reikuotūs pasuokumu ar atlaidi. Akceja byus nu 11. da 17. septembra, tī daīmama 30% atlaide vysaidim “Gora” pasuokumim (vaira ite). Izmontoj vareibu!

Pādejais laiks, kab pīsadaleit “Apceļo Latvijas pilis un muižas 2023” akcejā

Vēļ da 28. oktobra tev ir vareiba pīsadaleit akcejā “Apceļo Latvijas pilis un muižas 2023”, kurys golvonais mierkis ir veicynuot Latvejis kulturviesturiskuo montuojuma vierteibu populariziešonu. Vyss ir pavysom vīnkuorši – izdrukoj A4 formata kontrollopu i, apmeklejūt akcejis daleibys vītys, sajem zeimūdzeņu voi parokstu, voi ari izveidoj foto galereju socialajūs teiklūs, kur publicej biļdis ar LPMA gierbūni – tys vyss i vēļ vaira ir nūruodeits sātys lopā ITE.

Ej iz mežu

Voi tu jau itūgod esi bejs iz mežu sienīs? Ka vēļ naesi, tok niu ir pādejais breids, kab tū lobuot! Ka vēļ augustā mežā eisti navarēja atrast sieņs, tagad tūs ir pa pylnam – par tū var sprīst arī piec socialajūs teiklūs radzātūs biļžu. Dūdīs iz mežu, salosi sieņs i sataisi gordu mērceiti ar tikū nūroktuom guļbom!

Golvonais ir nasēdēt sātā, tok izbaudeit tū, kū mums snādz rudiņs!