Rokstu sagataveja: portals lakuga.lv

Popularuo Latgolys grupa “Baltie lāči” klauseituojim pīduovoj dzīsmi “Latgalietis ir…”. Tei izskaņ ari koncertizvadumā “Atgriežamies Latgolā”, kas radeits, īsadvasmojūt nu nazkodejuos Latvejis Nacionaluo teatra izruodis “Latgola.lv”. Dzīsmis teksta autors ir dzejnīks Jānis Peters, bet muzyku komponējs Valdis Zilveris.

Kai stuosta grupys solists Andris Baltacis, pyrmais singlys ir tik moza daleņa nu tuo dorba, kas itūšaļt nūteik īrokstu studejā, jo jau vosorys suokuos tiks izdūts grupys “Baltie lāči”, Latvejis Nacionaluo teatra akteru i draugu īskaņuotais albums “Atgriežamies Latgolā”, kurā skanēs ari cytys dzīsmis nu skateituoju īmeiļuotuo izvaduma, kurs vosorā tiks ruodeits Latvejis breivdobys estradēs.

“Albuma tapšonā īsaisteits gondreiž treisdesmit cylvāku: i muziki, i akteri, i konsultanti, i skanis specialisti. Dorbs ir drupeit sarežgeits, jo īroksts tūp Latgolā, bet akteru dzīduojumu īrokstom Reigā, gitarys partejis teik īspālātys Lelbritanejā i vēļ juouzklausa konsultanti nu Igaunejis i Anglejis,” par rodūšū procesu soka Andris Baltacis, dasokūt, ka paleidzeigu placu atbolstam snādz jūs draugi Kaspars Maks i dzīduotuojs Dainis Skutelis, kuri paleidzēja sagataveit itū dzīsmi.

“Grybu saceit, ka itys singlys ir latgalīšu spāka dzīsme! Kod apleik kaids zvuordzynoj i draud, mes atsokom ar “Latgalīts ir…”,” nūruoda Andris Baltacis.

Jaunū albumu varēs nūpierkt izruodis “Atgriežamies Latgolā” vosorys turis laikā, kod rodūšuo komanda gasteis Dikļūs, Kandovā, Neretā, Lejiscīmā, Ikškilē, Dūbele, Jiurmolā, Saulkrostūs, Ruojā, Modūnē, Jelgovā i Līpuojā. Beletus iz koncertizvadumu var nūpierkt “Biļešu paradīzes” kasēs i škārsteiklā.