Rokstu sagataveja: portals lakuga.lv

Nu 16. da 21. juņa Daugovpilī nūtiks Storptautyskais folklorys festivals. Tam itūreiz paradzāta plota i daudzveideiga programa sevkurai gaumei – ar koncertim, aktivys īsaistis meistarklasem, dazynūšom sarunom, orientiešonuos spēli i cytom aktivitatem, viestej Daugovpiļs Vīneibys noma Latvīšu i latgalīšu kulturys centrs.

Itūgod Storptautiskais folklorys festivals nūtiks nu 16. da 21. juņa, festivala laikā paradzāti vairuoki koncerti, Juoņa zuoļu izstuodis atkluošona, foto orientiešonuos spēle “Noķer Jāņus Daugavpilī”, sarunu kluba “Papardēs” aktivitatis, kur ar vysaidim ekspertim byus vareiba vaira dazynuot par pyrma kristīteibys i kristeigūs tradiceju mejīdarbeibu Juoņa dīnys svieteišonā, puču i zuoļu pīlītuojumu tautys medicinā, taipoš ari pošim praktiski dorbuotīs, gatavejūt zīdis nu Juoņu laika augu, sasīt sīru i tt.. Iz eipašom nūdarbeibom teik aicynuoti ari mozuokī Juoņa dīnys svieteituoji, kuri varēs īsavuiceit “pīdzeivuot Juoņus”.

Vīna nu festivala organizatoru Sarmeite Teivāne pastreipoj: “Itūreiz festivals ir eipašs taišni ar tū, ka teik organizāts ap saulgrīžu laiku, deļtam ari vysys nūtikšonys ir vaira voi mozuok tematiskys, tūs laikā mums vysim byus vareiba nu jauna vuiceitīs kai pīdzeivuot Juoņus. Ari Daugovpiļs Tradiceju sātā byus vysaiduokys praktiskys nūdarbeibys ar zynūšim meistarim. Svareigi ari pīminēt, ka pasuokuma nūslāgumā Daugovpiļs Pumpura skverā byus leluo sasadoncuošona!”

Festivala koncertūs byus vareiba saklauseit dzīsmis nu folklorys kūpom, tradicionalūs tautys dzīšmu i tautys deju grupom i kapelom nu Latvejis, Leitovys i Suomejis. Nu Latvejis kūpā ar festivala saiminīkim – Daugovpiļs Vīneibys noma Latvīšu i latgalīšu kulturys centra folklorys dzīšmu i deju kūpu “Svātra” (vad. Sarmeite Teivāne) – byus ari grupa “A.I.I.Z.” (Andris Grunte – kontrabass, Edgars Kārklis – multiinstrumentalists, klarnete, Ilze Grunte – gitarys, arfa, mandolina, čarango i c. i Zane Šmite – bolss, vargans), grupa “Dzilna”, folklorys ansamblis “Dzīsme”, folklorys kūpa “Grodi”, Krustpiļs kulturys centra tradicionaluos muzykys grupa “Krāce”, Rēzeknis nūvoda Kulturys i turysma puorvaļdis kadriļu deju grupa “Lūznovys kadriļs”, Patjanko saimis kapela, Bebrinis kulturys noma folklorys kūpa “Ritam”, Preiļu nūvoda kulturys centra folklorys kūpa “Rūtoj” i tautys muzykantu grupa “Teikas muzikanti”. Leitovu puorstuovēs instrumentaluos tautys muzykys grupa “Ratilai” i folklorys kūpa “Siaudela”, sovpus nu Suomejis īsarass tautys deju grupa “Kuhmon Keiketys Ry”. Vysuos nūtikšonuos īīšona ir bez moksys. Ar festivala programu var īsapazeit ITE.