Par sevi MJOLLNIR roksta: „Muna bierneiba paguoja Ludzā. Tod beju nūbraucs iz Rēzekni vuiceitīs tehnikumā, nu ituo tehnikuma trešū kursu brauču turpynuot Reigā. Tai i palyku Reigā da šai dīnai gon universitati pabeigdams, gon struoduodams. Ar muzyku beju tyvs nu bierneibys – muote vysod dzīduoja šyupeļdzīsmis. 3. klasē beju suocs īt Ludzys muzykys školā, kur mani nivīns nagribieja jimt, izjamūt akordeona školuotuoju. Bet deļ tuo, ka jis beja cīši borgs i reizem naadekvats, beju spīsts aizīt nu ituos školys nūsavuiciejs viņ pusūtra goda. Piec cīši lelys pauzis muzykā, es suoku jimtīs ar datora programom, kurymuos maņ īsapatyka komponēt… Tod maņ muote izduovynuoja pyrmū gitaru i nu tuo laika es pamozeišom suoku spieļuot i kū ta komponēt. Tāņ maņ sātā ir mozeņka studejeņa, ka tai var nūsaukt treis gitarys i aparaturu ar datoru vydā. Maņ vysod ir bejuse dūma (i tāņ vēļ ir) sataiseit grupu, bet na nu kuo pasagoda, a nu draugim… Bet na vysi draugi jādz i gryb spieļuot tū, kū es. Ot, tai pagaidom i palīk grupa ar vīnu daleibnīku – MJOLLNIR.”

Pagaidom vīna cylvāka grupys nūsaukums izvālāts par gūdu skandinavu pārkiuņa dīva Tora vasaram mjollnir, i kai izaruoda – MJOLLNIR pots ir dalieji suoms (eistuo pavuorde ar suomiska), kai jis soka – „taitod ir ar zīmeļu ašni”. Pārkiuņa dīva kluotbyutne jiutama ari MJOLLNIR muzykys stilā, kū var apzeimuot kai jaudeigu roku ci smogū tehno.

Dzīsmis „Bārzs” vuordi pīraksteiti piec krīvu padūmu laika animacejis kinys “Удевительное чудо” motivim. Tymā diveji bārni, skrīdami pa lelu futuristisku megapolisi, storp lelom metala sātom īrauga, kai caur asfaļta plaiseni stīpās mozs zaļš bierzeņš…