Rokstu sagataveja: portals lakuga.lv

Itūreiz kulturys īsacejumus nedeļai vaļsts svātku kruosā i temuos sagatavejuse literate i latvīšu volūdys školuotuoja Ineta Atpile-Jugane.

Itei ir na tik patriotisma i vaļsts svātku nedeļa, bet ari munys dzimšonys dīnys nedeļa. Varātu jau vysus pasaukt gostūs iz svātku balli, bet tai jau ir bejs kaidu šaļti atpakaļ, kod attaiseišonys svātkūs vysim duovynuoju sovu gruomotu “Dasadūrt dabasim”. Voi tod ir vārts atsakuortuot? Muni ituos nedelis kulturys īsacejumi byus saisteiti ar munu dzymtū pusi – Bolvu nūvoda Bierzpili, munu ilggadejū dorbavītu i kaidu sapynu.

Luočplieša dīnys nūtikšona Bierzpilī

Bolvu nūvoda Bierzpiļs pogosts ir boguots ar viesturyskū montuojumu. Itūnedeļ, 11. novembrī, 14.30 stuņdēs Bierzpiļs pogosta centrā nūtiks Luočplieša dīnys pīminis pasuokums. Gaidoma sveceišu i zīdu nūlikšona pi pīminiekļa, kas veļteits breiveibys ceiņu karaveirim i Luočplieša kara ordeņa kavalerim. Mums niu ir svareigi byut sūpluok, pīminēt, paklusēt i pasaceit paļdis par vysu myusu breiveibu.

Latgolys muokslinīku dorbu izstuode “Šūpoles/Leigačys”

Nav šmukuokys duovonys Latvejai dzimšonys dīnā par kasgadejū Latgolys muokslinīku dorbu izstuodi, kuru reikoj Latgolys Kulturviesturis muzejs. Ituo gods tema – “Šūpoles/Leigačys”. Izstuodē varēs apsavērt stuojmuokslys dorbus: gleznys, grafiku, skulpturys; vizuali plastiskuos muokslys – tekstila i keramikys dorbus –, taipat ari instalacejis laikmeteiguos muokslys nūskaņuos. Izstuodis atkluošona byus 15. novembrī 15 stuņdēs. Kasgadeji izstuodis atkluošonā apmaklātuojus gaida kaids puorsteigums. Varbyut itūgod tei byus vareiba pasašyupuot kaiduos leigačuos (koč voi simboliski)?

Mozais sapyns

Maņ ir sapyns Latvejis dzimšonys dīnys nedeļā apceļuot Latgolys piļsātys i pogostu centrus, kab pasavērt i pasaprīcuot, kai jī rūtojās svātkim. Nazynu, cik vītuos īspiešu byut i nūfotografēt, bet aicynoju sevkuru īsadvasmuot munam aicynuojumam! Nūviertejit, cik eipaši šmuka ir myusu Latgola vaļsts svātku laikā.