Rokstu sagataveja: portals lakuga.lv

Nūdybynuojums “Vītolu fonds” informej par jaunu stipendeju, kas paradzāta taišni Ludzys jaunīšim, kuri ar lapnumu kūp i sagloboj latgaliskū kulturys montuojumu. Tū dybynuojuse Ingrīda Turlaja – ar mīlesteibu pret dzymtū vītu i gribiešonu īdvasmuot jaunū paaudzi nūviertēt latgaliskuos tradicejis.

Zīduotuoja Ingrīda Turlaja ir Ludzys 1. vydsškolys (tagadejuos Ludzys piļsātys vydsškolys) absolvente, školu absolvējuse 1990. godā, bet juos muote Skaidreite Turlaja (tūlaik – Savicka) ir beiguse itū školu 1960. godā. Ingrīda sovā profesionalajā dorbā ir dabuojuse bakalaura i magistra gradus tīseibu zynuotnē, kai ari magistra gradu byuvuzjiemiejdarbeibys i nakustamuo eipašuma vadeibā. Tagad jei struodoj vodūšā omotā vaļsts puorvaļdē, nūdrūsynoj nakustamo eipašuma puorvaļdeišonys procesus. Nasaverūt iz sovim profesionalajim sasnāgumim, zīduotuojis prioritate ir latgaliskūs vierteibu saglobuošona.

Ingrīdys Turlajis 1000 eiro stipendeja tiks pīškierta kaidam nu Ludzys vydsškolys 11. i 12. klašu školānim. Lai nūvārtātu lobuokū kandidatu stipendejis sajimšonai, pretendenti tiks aicynuoti īsyuteit eseju voi video par temu “Muna dzymtuo vīta”, izceļūt latgalīšu volūdys nūzeimi i boguoteiguos tradicejis. Stipendejis pretendenti tiks nūvārtāti ari piec vuiceibu sasnāgumu, rodūšuo dorba satura, kai ari īsaistis latgaliskuos kulturys uzturiešonā kasdīnā.

“Ludza vysod ir bejuse seviška vīta – piļsāta, kas veiduoja mani par taidu cylvāku, kaida asmu tagad. Grybu, lai ari jaunīši apsazynuotu, cik boguota ir myusu Latgola, i ar lapnumu nastu tuos vuordu pasaulī,” pīzeist Ingrīda.

Vaira informacejis par stipendeju i tuos nūsacejumim aprelī varēs izzynuot Ludzys piļsātys vydsškolā i “Vītolu fonda” sātyslopā vitolufonds.lv

Kai informej “Vītolu fonda” puorstuove Annija Bulle, nūdybynuojumā jau ir vairuokys eipašys stipendejis studentim nu Latgolys, kai Zinaīdys Strods, Gunāra i Inārys Reiņu, Jura i Ritys Petričeku, Teodora i Rūdolfa Sīļu pīminis stipendejis, Rudzātu vydsškolys absolventu, Dakuļu saimis, Väino Keelmann i SIA “Kokpārstrāde 98” stipendejis. Tok vīneiguo, kur vēļ izcalta latgalīšu volūdys i kulturys jūma, ir Viktorijis Mickānis pīminis stipendeja, kas paradzāta Nautrānu vydsškolys absolventim – eipaši latgalīšu volūdys, viesturis i kulturys studentim.