Šudiņ, 8. augustā, 18:30 pi Latgolys Kulturviesturis muzeja byus svineiguo Ontona Kūkuoja pīminekļa atkluošona.

Ontons Kūkuojs ir Latgolys dzejnīks, rakstnīks, muokslenīks, keramikis, scenografs, akters, režisors i vīnkuoršs latgalīts, kurs vysod ir lepuojīs ar sovu izceļsmi. Kūkuojs ir Latgolys vierteiba, pīmiņa par jū teik globuota dzejis kruojumūs i gruomotuos, juo dorbus i keramikys izstruoduojumus var atrast gon muzejūs, gon ari privatajuos kolekcejuos.

Idejis i skulpturys autore tielneica Svetlana Skačkova atzeist, ka ideja par Kūkuoja pīminekļa sataiseišonu pasaruodejuse jau seņ. „Daudzim Ontons Kūkuojs ir latgalīša īmīsojums. Prūtama līta, jis nabeja ideals, i hrestomatisku varūni nu juo nasataiseisi. Lai kū jis suoktu dareit, jam pasadeve vyss. Golvonais, ka jis breineigi prota aplipynuot ar sovu dzeivis mīlesteibu i optimismu cytus i bez līka patosa vuiceja meiļuot sovu Dzimtini”, tai skulpturys autore.

Rēzeknis piļsātys dūmis prīšksādātuojs Aleksandrs Bartaševičs saceja: „Caru, ka itū vītu pi muzeja, kur nu ituos dīnys i vysod stuovēs Ontons Kūkuojs, īmeiļuos daudzi rēzeknīši – īs pasceit paļdis Ontonam par juo davumu Rēzeknei i Latgolai”.

Pīmineklis dabiskā lelumā atlīts Sanktpīterburgā i šudiņ tū pasvieteis veiskups Juoņs Buļs, atkluošonā pīsadaleis O.Kūkuoja radne, nūvodnīki nu Rogovkys, Ludzys J. Soikāna muokslys školys audziekni i školuotuoji i c.

Informaceja nu Rēzeknis piļsātys sātyslopys

Karteņā – O. Kūkuoja pīmineklis, foto S. Aizupiete