Rokstu sagataveja: portals lakuga.lv

Pi skaiteituoju tics žurnala “A12” apreļa/maja numers, i tymā var puorskaiteit intervejis ar muziki Eināru Eversu, grupys “Borowa Mc” lideri Aigaru Runči, literatis Inkys Latgolys pīredzi i cytys sarunys i stuostus. Numers veļteits tim, kuri roda, īdvasmoj i redz vareibys tī, kur cyti redz rūbežus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, ituo numera redaktore Madara Bērtiņa tuo īvodā roksta: “Asūt Latgolā, dareituoji nareši sajam vaicuojumus par rūbeža tyvumu i drūseibu. Ituo numera varūņus rūbežs nabīdynoj. Jim rūbežs ir na gola pītura, tok jaunys suokys, kas atteistej i vierzej iz prīšku. Rūbežs ļaun augt i paleidz atrast sovu vītu itymā pasaulī.”

Žurnala “A12” apreļa/maja numers izgaismoj personeibys i procesus, kas maina vidi mums apleik:

• Rodūšums ar atbiļdeibu i kvalitati – interveja ar Aigaru Runči par grupys “Borowa Mc” aktualitatem i jaunajim projektim.

• Attaiseit durovys latgaliskajam – kas ir latgaliskums i deļkuo tys ir svareigs?

• Vareibu horizonts – Ieva Leišavniece, Sandra Igaune i Krista Medne nūpierkušys iudiņa tūrni Bolvu centrā, kab radeitu vītu, kur sasatikt i atsapyust.

• Sarunys pi Lubuona – dramaturgs Jānis Baluodis (Balodis) par kūpīnys teatri i tuo lūmu vītejuos identitatis styprynuošonā.

• Latgolys kontrabass Dānejā. Interveja ar muziki Eināru Eversu – kai mentalitati varim sadzierdēt orkestra skaniejumā.

• Inka – sakriteibys i zeimis, kuruos sauc iz Latgolu.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – portala redaktore Laura Melne sagatavejuse rokstus par dramaturgu i režisoru Jāni Balodi, kai ari rakstneicu Leldi Jauju, bet portala vadeituoja Amanda Anusāne – interveju ar Aigaru Runči. Taipat žurnalā puorskaitoma portala redakcejis sagataveituo informaceja par jaunuokajim gruomotu i muzykys īrokstu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturyskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.