Rokstu sagataveja: portals lakuga.lv

Pi skaiteituoju tics žurnala “A12” juņa/juļa numers, i tymā var puorskaiteit intervejis ar ilustratori Jolantu Sondori, mecenati Ingrīdu Turlaju, muzikim Kalvi i Montu Sležim-Zaļkalnim i cytys sarunys i stuostus. Numers teik dasaceits kai nasteidzeiga skaitomvīla vosorys suokom.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, ituo numera redaktore Madara Bērtiņa tuo īvodā roksta par sovu mieginuojumu atsasaceit nu socialūs medeju lītuošonys: “Stuovūt veikala ryndā, gaidūt bārnu nu treneņa, ādūt, braucūt ar viļcīni – vysod vajag nazkū skaiteit, vērtīs voi klauseitīs. Parkū tai? Voi maņ baile palikt vīnai ar sovom dūmom? Voi varbyut maņ nimoz nav sovu dūmu? Vyss, kū dūmoju, ir nu socialūs medeju i viestu aizajimts kaida cyta redzīņs? Interesanti, ka maņ vajadzēja izīt nu Facebook, kab vyspuor par tū aizadūmuotu.”

Jaunais žurnala “A12” numers īdvasmoj, īpazeistynoj i vad ceļā iz Latgolu i cytom Latvejis dzeilem:

• Monta Vecuozuola (Vecozola) atkluoj sovu ceļu nu Reigys iz Latgolys mežim i pyrmū godu symtgadeigā lauku sātā – klusumā, dobā i Zemissardzē.
• Ilustratore Jolanta Sondore sovūs dorbūs ar vīglumu i ospruoteibu savīnoj iedīņa motivus ar Latgolys jutūni, rodūt vizuali gordys idejis, kas palykušys par atpazeistamu zeimynu.
• Ingrīda Turlaja doluos atziņuos par atbolstu latgaliskajam i drūsmi – audzynuot, augt i palikt ciļvieceigim.
• Kalvis i Monta Sleži-Zaļkalni ļaun īsavērt sovā ceļā iz muzyku i sātu laukūs.
• Inka stuosta par cylvākim i sajiutom, kas palykušys par juos Latgolys pīredzis simboliskim “magnetenim” – mozim, tok nūzeimeigim pīturys punktim ceļā pi seve.
• Atrassi ari Sielejis pīzeimis Jākubpilī, Drycānu viesturyskuos vierteibys, kai ari kulturys i muokslys nūtikšonu izlasi vosorai.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – portala redaktore Laura Melne ir autore rokstim par ilustratori Jolantu Sondori i Naujinis nūvodpietnīceibys muzeju. Taipat žurnalā puorskaitoma portala redakcejis sagataveituo informaceja par jaunuokajim gruomotu i muzykys īrokstu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturyskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.