Rokstu sagataveja: portals lakuga.lv

Piec nalelys pauzis muziks Sovvaļnīks publicej teksta video dzīsmei “Izmyrušuo vīta”. Dzīsmis teksta autors ir rogovkīts Pīters Jurciņš. Taišni Pītera Jurciņa dzejūli, kas tyka pīduovuoti Sovvaļnīkam deļ dzīšmu saceriešonys vītejūs pasuokumu boguotynuošonai, palyka par īmesli albuma “Cārtumi” īrokstam, kura gaideišonys svātki vēļ turpynojās.

Zynūt Sovvaļnīka patyku pret skumi, aizmiersteibu, depreseju, Pītera Jurciņa dzejūļs atroda sovu vītu muzika dailradē kai vīna nu skumeiguokūs dzīšmu. Kab paspūdrynuotu izjiutys, kurys pīduovoj dzejūļs, pasasokūt Dāvim Kotam tyka radeits teksta video, kurymā izmontuotys vītejuo fotografa Arvīda Gļaudys Nautrānu apleicīnis pamastūs sātu biļdis. Kai soka Dāvis Kots: “Dzīsmis video veiduots kai ceļuojums atmiņuos – par aizmierstom, pamastom i pagaistūšom vītom Latgolā. Ar animacejis, kusteibys i atmosferys efektim attāli paliks telpiski i dzeivi, dūdūt vareibu skateituojam īgrimt ainovā i pamaneit tamā seikys detalis.”

Sovvaļnīks ir pabeidzs dorbu pi sova catūrtuo albuma “Cārtumi” (latvīšu literarajā volūdā – “Rētas”). Jau piec pyrmuos publicātuos dzīsmis “Karaļs” klauseituoji var nūprast, ka albums atsaškiers nu īrostuo Sovvaļnīka smagnejuo skaniejuma, bet saglobuos melanholiskumu, kas rakstureigs i juo muzykai, i latgalīšu autoru (O. Seiksts, A. Rancāne, Marija Dzeisla i c.) dzejai.

“Lai cik skumi nabyutu, bet mes mierstam, i sāta jiut, kod jei palīk vīna, ari jei saskumst. Bet vyss jau īt pa riņči, kur koč kas mierst, tī ari dzymst. Voi atdzimšona nūtiks dreiži?” vaicoj Sovvaļnīks.

Sovvaļnīks (eistajā vuordā Ingars Gusāns) ir latgalīšu muziks, kurs da ituo ir izdevs treis albumus – “Sūpluok” (2009), “Bolts susātivs” (2010) i “Napaseitynuots” (2016), kurūs asūšuos dzīsmis ir saraksteitys ar pazeistamūs latgalīšu dzejnīku (Ontona Kūkuoja, Annys Rancānis, Oskara Seiksta, Valentina Lukaševiča i cytu autoru) vuordim.

Jaunuos dzīsmis “Izmyrušuo vīta” īrokstā pīsadalejuši ari Edijs Strušels (klavīris) i Gints Stankevičs (tausteni). Dzīsmis īroksts taiseits i Rēzeknē ar Denisa Smirnova paleidzeibu, i Reigā, “Factory Sounds Studio” pi muzykys producenta Ginta Stankeviča.

Albums “Cārtumi” izdūšonai teik gataveits ar Vaļsts kulturkapitala mierkprogramys “Latvīšu viesturyskūs zemu atteisteibys programa” i bīdreibys “Latgolys regiona atteisteibys agentura” atbolstu. Projektu eistynoj bīdreiba “Latgolys Producentu Grupa”.