Sesejis laiks, tok rokstu blogu.

Kalendarā pi sīnys aizzeimuots i atzeimāti vysaidi nūtykumi pa vysu vosoru. Augustā jimšu sova veida plenēru Ceradryvuos. Tys taidā gadīnī, ka Jurs maņ naizbesēs . Tai i saīt, ka byus juoizmontoj kotra vosorys breiva šaļteņa.

Kaštani, cereņi i.c plaukumi rozplaukuši i smuordoj. Nazkai, vuiceidamīs eksamenam, izguoju i balkona, kas ir Almys terase, i apreibu nu virmuojūšuom smaržom. Pyrmū reiz dzeivē. Tod mauce viersā leits ar pārkiuni. Tod mozs nagaiseņš. Paspieju izsmaržuotīs laikus. Alma ari.

Muns “japaņu leits” nūtyka paguošu godu, kod atbraucs nu vīnom nūvadeitom kuozom, siedieju ar olu duorzā i vierūs kaštanūs. Maņ jī pateik… Tod sazaceļ feini sylts viejs, apgluostei mani, radzādams munu ārtū turku pōzu, īzaskrīn i rozšketinei kaštanu zīdus, saveļ komulī i svīž maņ jūs sejā, iz motim, kliepī. Kai puosokā, kurymā nav centralūs varūņu. Tai es iz benča atsiedieju vysu “leita” laiku. Saprotu, ka tuoli maņ da geišom i juom da mane.

Ar kuozom bogota i itei vosora. Kai jau īrosts. Episkuos problemys kū viļkt mugorā i.t.t. Džeki var izaleidzēt ar vydškolys biņdzuceņu . Itū vosoru asu lyugts apmekleit divys kuozys. Vīnuos varēs normāli, byut par parostū gostu i paklinēt piec mičuošonys, ūtrymuos gon…tī vedieja lūma. Nagaidu ni nu vīnys nikuo – juos pošys paruodēs.

Kurš zyna, kurš nā, tok Rēzekneitē ir atsadariese taida vīta, kai COCO bārs.

Beju iz atkluošonys pasuokumu. Taitod, nalels aproksts –

Telpa L burta veidā ar vysu bāru, ar vysu skapa elementu jimā. Patyka bāra lustrys. Nu Krīvejis, laikam. Mebelis apleik “meikstuos”. Var vuoļuotīs. Augšejā stuovā chill out ustobys. Vokora turpynuojumā nu ļaudim izskanē replikys, ka jos atstuoj divdūmeigu īspaidu. Kas kuram. Ruodīs, ka taiduos ustabeņuos ir lobuok bučuotīs i aiztikt vīnam ūtru, na uorā aiz pakša. Kūpejuo nūskaņa – švīteigs, vintage, chill out bārs. Pin up girls ar beja īzarodušuos uzraut kaidu danci i uzsaukt apkuort lākojūšīm puišeļim pa mēriņam. Vyss elementā. Rēzeknē taida nav. XS ir sovaižuoks.

Atkluošonā main gostu lūmā spieļuo Dabasu Durovys. Nazynu, kai vysim, leluokajai daļai patyka jūs uzastuošonuos. Da, ari zānim spieliešonys skills podaudzs. Piec jūs nūspielātīm setim vibrē dziskoceka. Maņ vysa ļuste beidzēs ap 3.00 stuņdem – kod atskaņuo nazynomys izcelsmis krīvu popsu. Nikod naasu ar jū aizaruovs, deļ tam gryuši sprīst. Tok ceru, ka tys naklius par īrodumu. Ruodīs, ka ni deļ tam pierktys “meikstuos” mebelis. Taidu klubu/bāru pīteikūši i gona Rēzeknē. Vyspuor byutu feini, ka COCO bīžuok skaneitu “dzievuo muzyka”, tys dažkiertu eipašū nūskaņu, kai tuos tapetis i niule izstoroj. Lai nu kai i kas iz prīšku, elegants bārs. Byus interess apmekleit veļ. Atsarūt pi LMT i gaļis veikala, preteimā ~ Mirmex. Enjoy. Cenys … cenys, kai deļ taida švīteiga bāra. Napaprasieju viņ cik moksoj litris ašņa.

Tys vysā vysumā i vyss. Maņ seseja i … ai.