Kalenders
15. majā 16 stuņdēs ar izstuodis atkluošonu Rotko muzejā nūsaslēgs 14. Storptautyskais keramikys muokslys simpozejs “Ceramic Laboratory 2026”, atruodūt pīcpadsmit muokslinīku dorbus, kas radeiti treis nedelis ilgā rodūšā rezidencē Daugovpilī.
Simpozejā i izstuodē pīsadola Robins Kerrs (Robin Kerr, Šveice), Džuna Hi Kima (Joon Hee Kim, Kanada), Fausto Salvi (Itāleja), Džesika Smita (Jessica Smith, ASV), Roksija Li (Roxy Lee, Vuoceja), Malvina Kovalevska (Malwina Kowalewska, Pūleja), Jola Vale (Yola Vale, Portugale), Mihals Žeslavskis (Michał Żesławski, Pūleja), Hanna Mjadzvedzeva (Hanna Miadzvedzeva, Pūleja/Boltkrīveja), kai ari Juta Rindina, Lilija Zeiļa, Una Gura, Nellija Dzalba, Kristīne Nicmane i Ilona Abdulajeva (Latveja).
Īīšona pasuokumā ir bez moksys.
Izstuode apsaverama da 30. augusta.
Latgolys regiona muokslinīku kasgadejuo izstuode Rotko muzejā itūgod rysynoj temu “Pierobeža”, puļcejūt sešdesmit četrus vysaidu paaudžu i medeju autorus, kurūs dzeive i rodūšais ceļš tai voi cytaiži īsavyn Latgolys kulturtelpā. Izstuodis kurators Aivars Baranovskis nūruoda, ka izstuode atkluoj pīrūbežu kai vītu, kur raisuos kai praktiskys, tai muokslinīcyskys izalaseišonys i puorvierteibys –palikšona i aizīšona, tradiceja i laikmeteigums, vītejais i globalais.
