Kalenders
Nov
26
Sai
Nov 26 @ 13:30 – 15:00
Registraceja daleibai pasuokumā ITE
Nov 26 @ 16:00 – 18:00
26. novembrī 16.00 stuņdēs Andreja Upīša memorialajā muzejā Reigā (Breiveibys īlā 38–4) nūtiks Sandrys Martys Grudulis autorvokors. Tys aizsuoks jaunu pasuokumu cyklu muzejā – “Ceļā uz pirmo grāmatu”.
Sandra Marta Grudule izauguse Teiču pūrā, tok jau trešū desmitgadi dzeivoj Reigā. Studiejuse pasuokumu režeju i ekonomiku, vadejuse kulturys īstuodis, struoduojuse drukuotajūs i interneta medejūs žurnalistikys i reklamys jūmā, kai ari vysaiduokus gadejuma dorbus, kas atstuoj breivu golvu dūmom. Vuicejusēs Literaruos akademejis prozys i dzejis meistardarbneicuos. Uzastuojuse ar dzejis skaitejumim “Dzejnieku liftā” performancēs, festivalā “Sansusī”, pīsadalejuse Dzejis slamūs, organizējuse Dzejis dīnu pasuokumu “Vienpatņu salidojums”, publiciejusēs presis izdavumūs. Sajāmuse golvonū bolvu pyrmajā Velgys Krilis vuordam veļteitajā konkursā. Ir ceļā iz sovu pyrmū gruomotu.
Pasuokumā Sandra Marta Grudule skaiteis dzejis tekstus latvīšu i, kai soka poša dzejneica, “sovys babys” volūdā (Teiču pūra apleicīnis latgalīšu volūdys izlūksnē) nu tūpūšuo romana dzejā, kas īsuokts raksteit ar nūsaukumu “Herbārijs”, turpynuots ar “Upe aizskalos”, tok itūšaļt kuortojās zam nūsaukuma “-ība”.
Poša autore soka: “Es zynu, kai maņ byutu juoroksta, kab jums īpasatyktu, tok maņ tam vaira nav laika. Svareiguok ir paspēt pastuosteit munys dzymtys, munys Latgolys, muna pūra i munys paaudzis stuostus i padareit tū piec īspiejis gūdeiguok, nasaudzejūt ni sevi, ni cytus. Ituo romana raksteišona maņ ir ari dzīdynuošonuos – skoborgu raušona, pyužņojūšu rānu atpliesšona, izteireišona, aizšyušona i pīdūšona – myužeigu pīdūšonu.”
“Sandra Marta Grudule roksta hiperealistiskā tīšumā i viereigumā. Juos volūdys energeja i jiuteigums pret nataisneigū voi sovaižū pasauli izstuosta tuos paaudzis stuostu, kurai itūšaļt dzejā tryucs sova bolsa. Juos Dīva nūlīgums palīk par jaunu īelpu lyugšonai, juos suopu klīdzīņs ļaun apsazynuot tū, ka itei paaudze ir cīši dzeiva i spiejeiga radeit. Apvīnojūt sovā dzejā latvīšu i latgalīšu volūdu, ari fonetiski Sandra roda jaunu dzejis laiktelpu, kurā izstuosteit myusu seņču stuostu pavysam nu cyta skotupunkta kai leidz itam. I leidz ar tū dabuot jaunu telpu dūmai, izpratnei, pīdūšonai,” tai par autori stuosta Inga Gaile.
Īīšonys moksa: 2 eiro.
Nov 26 @ 19:00 – 21:00
Nov
27
Svā
Nov 27 @ 14:00 – 15:30
Voi Latgola itaida byus myužeigi, voi vys tik tei puorsamej, koč kam pagaistūt, bet kam cytam īmūt vītā? Šveicis muzikis i muokslinīks Vinsents Flikigers (Vincent Flückiger), pavodūt Latgolā daudz laika, tū sovulaik īmyužynuojs zeimiejumu serejā “Latgale laiku ritā”, bet zeimiejumim radeit eisus stuostus uzaicynuojs latgalīšu kulturys personeibu Edeiti Husari. Niu obeju sadarbeiba byus aptaustoma, apsaverama i puorskaitama bīdreibys “LgSC” izdūtajā gruomotā “Trusīni vessim reitā pi puiša”.
27. novembrī ceļu pi skaiteituoju suoks Pāvela Snasela gruomota “Welcome to Latgale, my heart”, informej pats autors. Tei ir dzejūļu i stuostu gruomota angliski, kurā var skaiteit par autora ceļuojumim iz Latgolu; juo dūmom i redzīnim par Latgolu i Latveju; Latgolys kulturys tradiceju i vidis gūdynuošonu; Pāvela personeigū dzeivi i attīceibom ar Latgolu i Latveju.
Gruomota ir par Čehejis pylsūņa vāruojumim i īspaidim Latgolā vīna goda garumā. Pyrmī īspaidi lyka viļtīs, tok pa drupeitei, lobuok īpazeistūt Latgolys dobu, tradicejis, cylvākus, veidojās cyts prīškstots par tū, kas ir Latgola. Jam ir sovpateiga pīredze, atkluojūt unikalū kulturu i sateikūt vysaiduokus cylvākus. Tai kai Pāvelam jau ir prīškstots par Latveju i Latgolu, jis dolās ari sovūs īspaidūs i puordūmuos par situaceju niu i problemom.
Gruomotys golvonais mierkis ir popularizēt Latgolu kai turisma golamierki i styprynuot latgaliskū identitati. Tuos mierkauditoreja ir angliski runojūšī ceļuotuoji i skaiteituoji nu Leitovys, Latvejis, Igaunejis, Suomejis i Čehejis. “Welcome to Latgale, my heart” izdūta div versejuos – e-gruomotā i fiziskajā kopijā. Fiziskūs kopiju skaits ir īrūbežuots – leidz 200 kopiju. Gruomota ir tik suokums tam, kū Pāvels Snasels i juo uzjāmums “Welcome to Latgale IK” gryb dareit.
“Welcome to Latgale, my heart” izdūšonys tīšsaistis pasuokums byus 27. novembrī 19.00. Vysa informaceja par gruomotu, tymā skaitā, kai tū nūpierkt, i pasuokumu atrūnama autora Instagram profilā.
