Latgolys pyrmizruodi pīdzeivuos kina “Myužeigais kalinders”

LaKuGa 14. Novembris, 2012. gods Comments Off on Latgolys pyrmizruodi pīdzeivuos kina “Myužeigais kalinders”
Latgolys pyrmizruodi pīdzeivuos kina “Myužeigais kalinders”
Aizguojušā nedeļā Reigā pyrmizruodi pīdzeivuoja dokumentaluo kina „Myužeigais kalinders”, nu reitu, 15. novembrī, byus kinys pyrmizruode Latgolā – Rēzeknis nūvoda pašvaļdeibys sātā.

Kina „Myužeigais kalinders” taiseita Rēzeknis nūvoda Nautrānu pogostā, i tei ir taiseita kai spylgts i autentisks Latgolys lauku dzeivis atspīgeļuojums, kas paruoda latgalīšu identitatis styurakmiņus: tradicejis, dzeiveigumu i latgalīšu volūdu. Kina viestej par diveju dzymtu – Jurdžu i Ivulānu – puordzeivuotū cauri godu symtu mejom.

Kinys radūšuo komanda: režisors i scenaris Juoņs Ūzuleņš-Ūzuls, operators Andrejs Verhoustinskis, montaža – Solvita Cerecka, skona režisore Anete Vonoga i producents Vilņs Kolnaellis.

Kinu produciejuse kompaneja – Kinu studeja RIJA. Kinys garums – 70 minoti, kina ir latgaliski ar subtitrim latvyski.

Kinys pyrmizruode Latgolā 15. novembrī 17:00 byus Rēzeknis nūvoda pašvaļdeibys lelajā zalā (Atbreivuošonys alejā 95). Pyrmizruodē Rēzeknē, taipat kai Reigā, skateituojus i klauseituojus prīcēs Rogovkys etnografiskais ansamblis, byus ari kinys režisors i scenarists Juoņs Ūzuleņš-Ūzuls i producents Vilņs Kolnaellis. Īeja bez moksys.

Nu 20. novembrī 14:00 i 18:00 kina byus nūsaverama ari pošā Rogovkā – Nautrānu vydsškolys zalā. Iz seansu īsarass kinys varūni i Rogovkys etnografiskais ansamblis. Īeja byus bez moksys.

Da 19. novembram kinu „Myužeigais kalinders” var nūsavērt ari Reigā, kinu teatrī „Splendid Palace”. Vaira informacejis: http://www.splendidpalace.lv/lv/hall_events/view/488

Atsavieršona iz kinys prezentaceju Reigā, 7. novembrī: http://lakuga.lv/2012/11/08/%E2%80%9Emyuzeigais-kalinders-i-stypruos-latgolys-saimis/

Karteņa nu kinys prezentacejis Reigā, runoj kinys režisors, foto nu LaKuGys arhiva

Komentari slāgti.