„Myužeigais kalinders” i stypruos Latgolys saimis

„Myužeigais kalinders” i stypruos Latgolys saimis

Vakar, 7. novembrī Reigā, kinu teatrī „Splendid Palace” nūtyka režisora Juoņa Ūzuleņa-Ūzula (Jāņa Ozoliņa-Ozola) dokumentaluo kina „Myužeigais kalinders”. Kina ir etnisks stuosts par Latgolys tagadni i paguotni ar diveju dzymtu pīdzeivuotū cauri godu symtu mejom.

Kina viestej par Rēzeknis nūvoda Kuorklīnīku dzeraunis saimem – Jurdžim i Ivulānim. Kuorklinīkūs sovulaik dzeivuojis ari dzīsminīks Andrivs Jūrdžs (1845-1925), kurs sacerieja dzīsmis i dzejūļus, vuoce vītejū folkloru i, puorraksteidams ar rūku jūku gruomotys, drukys aizlīguma laikā izgleituoja sovus nūvodnīkus. Nu Jūrdža gruomotys „Myužeigais kalinders”, kurā apkūpuoti padūmi zemnīkim, smīkla stuosteni i tautysdzīsmis, jimts ari ituos kinys nūsaukums.

Jurdžu i Ivulānu saimu sirsneigī stuosti atkluoj Latgolys lauku cylvāku dzeivi cauri goda laikim, tradicionalūs omotu dareišonu kasdīnā i latgalīšu volūdu kai vīnu nu dzeivis styurakminim. Kuorklinīku dzeraunis ļauds ir cylvāki, kas dzeivoj saskaņā ar lauku dzeivi i car, ka jūs īsuoktū turpynuos ari bārni i mozbārni. Reizē tei atkluoj ari myusdīnu Latvejis lauku tragedeju ar pamastom sātom i aizbraukušim cylvākim.

Kai pyrma kinys izruodeišonys stuosteja režisors, kina ir veļtejums juo vacvacuokim, kas guojuši nu Kuorklinīku dzeraunis. Koč ari režisors Juoņs Ūzuleņš-Ūzuls pats ir dzims i audzs Līpuojā, vys tik nagryb pagaisynuot ari latgaliskuos saknis i vītejim jis ir sovejais. Obejis saimis beja kluotīnē ari kinys pyrmajā atruodeišonā i taipat ar sovom dzīsmem prīcieja Rogovkys etnografiskais ansamblis, kuri ari beja razdami kinā „Myužeigais kalinders”.

Iz kinys pyrmizruodi beja sasapuļciejuši cīši daudzi ļaužu, kas viereigi sekuoja leidzi saimu dzeivei iz leluo ekrana. Šaļtim natyka taupeiti ari aplausi un nu sirds puordzeivuots leidza vysom nūtikšonom.

„Laime ir tod, kod tovi meilī ir apleik, kod tevi gaida sātā, kod tu jūs meiļoj, kod gribi par jim pasaryupēt,” kinys golā soka vīns nu kinys varūņu jaunuokuos paaudzis i, nūsaverūt kinu, skateituojs pajem leidza ari gabeleņu ituos ekranā radzātuos laimis.

Kinys radūšuo komanda: režisords i scenarists Juoņs Ūzuleņš-Ūzuls, operators Andrejs Verhoustinskis, montaža – Solvita Cerecka, producents Vilnis Kolnaellis, skona režisore Anete Vonoga, producejūšuo kompaneja – Kinu studeja RIJA.

14. novembrī kinys izruodeišona paradzāta Rēzeknis nūvoda dūmis telpuos, nu 15. novembrī – atsagrīzs sātā – Rēzeknis nūvoda Rogovkā.

Da tam kina nūsaverama Reigā, kinu teatrī „Splendid Palace”. Tyvuokī seansi:

10. novembrī 17:00
11. novembrī 14:30
12. novembrī 15:00
13. novembrī 17:00

Biletus īprīškpuordūšonā var nūpierkt Biletu Servisa kasēs vysā Latvejā. Biletu cena 2,50 Ls, školānim, studentim i pensionarim – 2,00 Ls.

Kinys taiseišonu daleji finansiejs Nacionalais Kino centrs. Eipašu paļdis kinys taiseituoji soka režisora Juoņa  Ūzuleņa-Ūzula mamai Lūcejai Ūzuleņai-Ūzulai.

Kartenis – kinys “Myužeigais kalinders” pyrmizruode, foto LaKuGa


Print Friendly, PDF & Email

Nūtikšonu kalendars

Sep
29
Pīk
16:00 Rotko muzeja kruojuma izstuodis ... @ Daugovpiļs Marka Rotko muokslys centrs
Rotko muzeja kruojuma izstuodis ... @ Daugovpiļs Marka Rotko muokslys centrs
Sep 29 @ 16:00 – 17:00
Pīktdiņ, 29. septembrī, 16.00 stuņdēs Daugovpiļs Marka Rotko muokslys centrā, iz prīšku – Rotko muzejā, sūpluok muokslinīka Marka Rotko originalu ekspozicejai tiks atkluota kruojuma izstuode “Nr. 2 [Bez nosaukuma]”. Kruojuma izstuodei izvālāti muokslys dorbi, kas[...]
19:00 Aijis Rimšys pīminis koncerts “Z... @ Latgolys viestnīceiba "Gors"
Aijis Rimšys pīminis koncerts “Z... @ Latgolys viestnīceiba "Gors"
Sep 29 @ 19:00 – 21:00
Latgolys rūženis, dzīduotuojis i dzīšmu autoris Aijis Rimšys myusu vydā nav jau ostoņpadsmyt godu, tok juos dzīsmis dzeivoj i skaņ. Desmit muzykalajūs godūs – deveni dzīšmu albumi! Taids ir montuojums, kurū mums pamatuse Aija Rimša,[...]