Itūgod Latgolā teik sveiteita Mikeļa Bukša 100. dzimšonys dīna ar dažaidom nūtikšonom. Vileks nūvoda Plešovā tyka sataiseita i pastateita jauna pīminis vīta, Latgolys Kulturys centra izdevnīceiba nu jauna izdavuse autora golvonū dorbu „Latgaļu atmūda”, taipat Bukšam veļteits pasuokums 3. Pasauļa latgalīšu saīšonā Rēzeknē. Sasadorbojūt Bolvu Centralajai bibliotekai, Latgolys Kulturviesturis muzejam i Latvejis Nacionalajai bibliotekai sataiseita ari itei izstuode „Latgolys dvēselis tulkam Mikeļam Bukšam 100”, kas da itam beja apsaverama Latgolys Kulturviesturis muzejā Rēzeknē, Latvejis Nacionalajā bibliotekā Reigā i niu atsagrīž tyvuok Bukša dzymtajom vītom. Bolvu nūvoda muzejā izstuode byus apsaverama da goda beigu, nu piečuok tei byus apsaverama Baļtinovā, Vileks nūvoda bibliotekā i cytūs Latvejis nūvodūs.

Izstuodē ir vareiba apsavērt  Mikeļa Bukša viestulis, kartenis i gruomotys, juo laikabīdru – Alberta Pleiša, Konstantina Poča, Vladislava Luoča – atminis par Mikeļa dzeivi i darbeibu, kai ari videomateriali par Bukša dzeivisbīdris Janīnys Bukšys pādejū gasteišonys reizi Latvejā 20. gs. 90. godūs.