Školāni aicynuoti pīsadaleit konkursā “Muna sāta, škola, pogosts/ piļsāta 1917.–2015. godi”

LaKuGa 14. Oktobris, 2015. gods Comments Off on Školāni aicynuoti pīsadaleit konkursā “Muna sāta, škola, pogosts/ piļsāta 1917.–2015. godi”

Rēzeknis Latgalīšu kulturys bīdreiba sadarbeibā ar bīdreibom “Kukuži”, “Jaunieši Baltinavai”, Latgalīšu volūdys, literaturys, kulturviesturis školuotuoju asociaceju, Rēzeknis Augstškolu, sagaidūt Latgolys apsavīnuošonys kongresa, Latvejis vaļsts dybynuošonys symtgadi, izsludynoj konkursu “Muna sāta, škola, pogosts/ piļsāta 1917.–2015. godi”, apzynojūt Latgolys regiona dzymtu, školu, pogostu viesturis spylgtuokuos nūtikšonys, personeibys, viesturiskuos līceibys atmiņu stuostejumūs, karteņuos, jaunīšu kolažuos i cytuos myusdīnu jaunīšim pīeimamuos rodūšajuos tehnologejuos.

Konkursa mierkis ir apzynuot lokalūs, individualūs narativus (stuostus) par spylgtuokajim nūtykumim, personeibom dzymtuos, školuos, pogostūs voi piļsātuos, kas ruoda 1917. goda situacejis raksturuojumu, tuo ītekmi i izmainis gondreiž 100 godu ilgā periodā. Lobuokī dorbi tiks izmontuoti datorspēlis, kai ari dokumentala izdavuma par Latgolys apsavīnuošonys kongresu veiduošonā, sasaistūt itū viesturiskū faktu ar Latvejis vaļsts dybynuošonys i pastuoviešonys palīkūšajom vierteibom, dokumentim, līceibom, fotografejom.

Konkursā var pīsadaleit Latgolys regiona 8.–12. klašu školāni individuali ci grupuos (5–10 daleibnīki). Obejūs gadīņūs var tikt pīsaisteits konsultants: školuotuojs, nūvodpietnīks i cyts.

Dorbi tiks vārtāti divejuos vacuma grupuos: 8.–10. klase, 11.–12. klase, atseviški individualī i grupu dorbi.

Pyrma konkursa dorbu izstruodis dalinīkus aicynoj puorskaiteit laikrokstu “Gaisma”. Itūgod apryt 110 godi kai suoce izīt pirmuo latgalīšu avīze „Gaisma”, partū konkursa formats ir avīzis veiduošona, ītverūt konkursa mierkī nūruodeitū saturu.

Saturyskais pamats ir intervejis, atminis, originaldorbi, cytu dorbu fragmenti, statistika, vizualī attāli par dzymtys, školys, pogosta raksturuojumu 1917. godā i saleidzynojūt ar myusu dīnom.

Konkursa dorbs ir juosagatavej A3 avīzis formatā uz diveju lopu (vīns atvārums). Avīzei juobyun sagataveitai atbylstūši konkursa daleibnīka skatejumam par avīzis izkuortuojumu, vizualū nūformiejumu, rubrikom.

Konkursa dorbi var tikt īsnīgti latvīšu, latgalīšu volūdā, ari bilingvali, izmontojūt latvīšu voi latgalīšu i krīvu volūdu.

Dorbi īsnīdzami elektroniski (pdf), syutūt iz adresu: ilga13@inbox.lv.

Dorbu īsnīgšona da 2015. goda 10. novembra. Nūslāgums 2015. goda 29. novembrī literari muzykalajā pasuokumā Andrejdīnys.

Konkursa nūlykums.

Komentari slāgti.