Latvejis Literaturys goda bolvys (LaLiGaBa) ekspertu komiseja nūsaukuse bolvys nominantus. Nominacejā par spylgtuokū debeju izvierzeita ari Anita Mileika par dzejūļu kruojumu “mūžīgā nepārtikusī stirna”. Laureati tiks paziņuoti i gūdynuoti Latvejis Literaturys goda bolvys ceremonejā, kas nūtiks 21. aprelī Spīkeru koncertzalā.

Kategorejā “Spylgtuokuo debeja literaturā” nominātys: Anita Mileika par dzejūļu kruojumu “mūžīgā nepārtikusī stirna”, Madara Gruntmane par dzejūļu kruojumu “Narkozes”, Sabīne Košeleva par romanu “Rīga-Maskava. 21. gadsimta mīlasstāsts” i Elīna Bākule-Veira par dzejūļu kruojumu “Zilonis okeāns”.

Itūgod Anita Mileika jau sajāmuse Latgalīšu kulturys goda bolvu “Boņuks 2015” nominacejā “Lobuokais snāgums literaturā”.

Latvejis Literaturys goda bolvai nominanti izvierzeiti pīcuos kategorejuos – lobuokais dzejis dorbs, lobuokais prozys dorbs, lobuokais originalliteraturys dorbs bārnim, lobuokais uorvaļstu literaturys tulkuojums i spylgtuokuo debeja –, kai arī pīškiertys divejis specialbolvys – par nūzeimeigu īguļdejumu pasauļa kulturtekstu latviskuošonā, kai ari myuža īguļdejumu.

Bolvys sajiemieji tiks paziņuoti i apbolvuoti Latvejis Literaturys goda bolvys ceremonejā 21. aprelī 18.00 Spīkeru koncertzalā. Bolvu sajiemieji tiks pi naudys bolvu, kai ari bolvys simboliskuo veidūla – LaLiGaBa lampys, kuruos idejis autors ir dizaina studeja “MĀJO”. Bolvys padūšonys ceremoneju veidoj rakstneica Inga Žolude, režisors Vīsturs Ruoziņš, scenografs Valters Kristbergs, video režisors Kristaps Kalns i gaismu muokslinīks Juoņs Snikers. Pasuokumu vadeis rakstneica i žurnaliste Kristīne Želve i rakstnīks Pauls Bankovskis, par muzykalajom intermedejom pasarypeis pateikamuos muzykys ansamblis “Brokastis četratā”.

Latvejis Literaturys goda bolvys ekspertu komisejā struoduoja i 2015. goda literarū veikumu izviertēja ekspertu komiseja: literaturkritike Anda Baklāne, rakstnīks Arvis Kolmanis, filozofs i publicists Ilmārs Šlāpins, literaturzynuotneica Austra Gaigala, dzejnīks Aivars Eipurs, kulturys žurnaliste i literarūs projektu vadeituoja Liega Piešiņa, literaturys i latvīšu volūdys školuotuoja, literaturzynuotneica Lita Silova, literaturzynuotneica Sandra Ratniece i dzejnīks Artis Ostups

Latvejis Literaturys goda bolva ir nūzeimeiguokuo goda nūtikšona literaturys nūzarē Latvejā, kas nūdrūsynoj literarūs dorbu profesionalu izviertiejumu i atzineibys izsaceišonu izcyluokajim dorbim, kurī goda laikā izguojuši Latvejis rakstnīceibā. Par bolvys nūtikšonu ryupejās Storptautyskuo Rakstnīku i tulkuotuoju sāta i Latvejis Rakstnīku savīneiba.