Nūsasliedzs zeimiejumu konkurss “Muna tautysdzīsme kruosu volūdā”

LaKuGa 31. Majs, 2016. gods Comments Off on Nūsasliedzs zeimiejumu konkurss “Muna tautysdzīsme kruosu volūdā”
Nūsasliedzs zeimiejumu konkurss “Muna tautysdzīsme kruosu volūdā”

21. majā Dagdā nūtyka III Storptautyskais bārnu i jaunīšu muzykys, deju i mūdis festivals “Apskauj mani, māmuliņa!”, kuruo ītvorūs tyka gūdynuoti veiksmeiguokī vizualuos muokslys konkursa “Muna tautysdzīsme kruosu volūdā” dorbu autori nu vysys Latgolys, informej bīdreibys “Teira Latgolys muoksla” vadeituoja Evija Maļkeviča.

Konkursa pamatideja – styprynuot saikni storp divejim informacejis laikmatim i sekmēt jaunuos paaudzis dziļuoku izpratni par montuotom vierteibom, gudreibom, zynuošonom i simbolim, kas ītvarti Dainu skapī globuotajuos tautysdzīsmēs. Konkursa mierkis beja veicynuot Latgolys jaunīšu interesi par vītejū kulturys montuojumu, rūsynuot jaunīšus pieteit, izzynuot, īsadvasmuot i pīlītuot latgalīšu tautysdzīsmis.

Jaunīši nu Latgolys regiona školu da ituo goda apreļa beigu tyka aicynuoti nu virtualuo Dainu skapa dainuskapis.lv izavielēt vīnu tautysdzīsmi latgalīšu volūdā, attāluot itū tautysdzīsmi (tuos viestejumu i simbolus) zeimiejumā, nūformejūt rodūšū snāgumu iz A4 lopys sevkurā vizualuos muokslys tehnikā. Konkursa dalinīki itamā reizē tyka eipaši aicynuoti vaicuot i attāluot taidys tautysdzīsmis, kas viestej par saimis sadzeivi, tradicejom i vierteibom.

Kūpā konkursā tyka īsnīgti 107 jaunīšu dorbi nu 17 izgleiteibys īstuožu i jaunīšu centru – Andzeļu pamatškolys, Ondrupinis pamatškolys, Osyuna pamatškolys, Dagdys vydsškolys, Dravnīku pamatškolys, Gaļānu pamatškolys, Konstantinovys pamatškolys, Nautrānu vydsškolys, Maltys vydsškolys, Preiļu Muzykys i muokslys školys, Rāznys pamatškolys, Škaunis pamatškolys, Špogu vydsškolys, Špogu Muzykys i muokslys školys, kai ari nu Austrumlatvejis rodūšūs pakolpuojumu centra “Zeimuļs”, Maltys bārnu i jaunīšu centra i Preiļu nūvoda Bārnu i jaunīšu centra.

Kūpā tyka izlaseiti 33 laureatu dorbi klašu grupā nu 1. da 9. klasis, kai ari 32 laureatu dorbi nu pyrmsškolys izgleiteibys īstuožu, kas festivala laikā beja apsaverami sevkuram interesentam. Iz prīšku itī dorbi tiks izstuodeiti ari cytu pasuokumu ītvorūs i Dagdys nūvoda īstuodēs, kab rūsynuotu nu kulturys montuojuma īsadvasmuot ari cytus.

Konkursu “Muna tautysdzīsme kruosu volūdā” reikuoja Dagdys nūvoda Izgleiteibys, kulturys i sporta nūdaļa sadarbeibā ar kulturys i muokslys bīdreibu “Teira Latgolys muoksla” i ar Latvīšu Folklorys kruotuvis atbolstu.

Komentari slāgti.