Dzejūļu autore: Gunta Ločmele

Portals lakuga.lv pīduovoj sovim skaiteituojim Guntys Ločmelis dzejūļus. Par tim poša autore soka: “Byut ceļā – tei ir vīna nu munu spieceiguokūs īškejūs sajiutu. Pa ceļam ir vītys, cylvāki i nūtikšonys. Sovpus kotrys dzejūļs deļ mane ir kai pītura, kur iz ceglu sīnys saraksteitys pa ceļam nūgiutuos dūmys i sajiutys.”

#Saļņova
Cik cieški celi sasapyn komulā,
tok kompass vysod ruoda iz tevi.
Ceļa karti kai musturi
īaužu ritiņa spīčūs i skrīnu.
Pi teve vad vysi celi,
Viņ nadzeņ paceli.

#Kuorsova
Kaisleibys tovūs buduarūs
vēļ leluokys nakai meksikaņu serialūs.
Verūs caur pierstim,
reizem sorkstu, reizem kauns…
Saule lēks, byus cyta dīna,
viņ tu ar sovim zababonim
jaunuoka napalīc.
Napalīc vīna…

#Malnova
Nazkod man patyka bučuotīs
ar tevi vokorūs pasatā.
Kurtkys kārmanūs laidies kompetys
i apsastuoja laiks.
Dagunā sytuos lāta dizeļa
i koledžys iedneicys smuords.
Niu tu seits
i es puorpuorem seita.
Pa kripateņom raugu salaseit
nazkod nūgrauduotūs godus.
Vaira naatguodoju
ni tova stuova, ni ocu,
ni telefona numera,
ni kompleksūs pušdīņu pīduovojuma.
Seita.

#Ludza
Šudiņ tu smuordoj piec pavasara
i drupeit piec seipulu maizis.
Bez saulis lelajā stuņdinīkā
iz šaļti apsastuoj laiks.
Es grybātu, lai otkon
pylnys ceriņu zīdu sauvis
tu saber man motūs.
Tod pamiertu kuojis i dvēsele
nu taidys sasatikšonys ar tevi.
Tok šudiņ tu smuordoj piec pavasara
i drupeit piec seipulu maizis.

#Rēzekne
Ar tovu pavasari pīelpuovu pylnys kryuts,
saskaiteju kotru trotuara akmini i peili upē.
Tovs gors i muna mīsa – saauga jau seņ i cīši,
ka luksofori myusim viņ deļtuo,
lai laikā apsastuotu, lai tevī napazustu.

#Daugovpiļs
Tu, es, pylnmieness i pms.
Myusu storpā nazkaida kimeja,
centrs, cītūksnis, pervomaika.
Bedris tovūs pogolmūs napagaist
kai caurumi munuos zečies.
Tovu sirdspukstu atbolss
atskaņ tramvaju slīdēs.
Tu vysod byusi mums laimeigais reiss,
es – viņ pagaidu pītura tovā maršrutā.

#Reiga
Soka, ka latgalīšim
Reiga da ceļgolu.
DA KOKLA!!!