Itūnedeļ tiks atkluotys Daugovpiļs teatra dīnys Reigā

LaKuGa 27. Februars, 2017. gods Comments Off on Itūnedeļ tiks atkluotys Daugovpiļs teatra dīnys Reigā
Itūnedeļ tiks atkluotys Daugovpiļs teatra dīnys Reigā

Jau itūnedeļ Daugovpiļs teatris atkluos tradicionaluos Daugovpiļs teatra dīnys Reigā, kurūs ītvorūs nu marta da maja vairuokys Daugovpiļs teatra izruodis varēs nūsavērt Dailis teatrī i Latvejis Nacionalajā teatrī, informej Daugovpiļs teatra puorstuove Janīna Ivanova.

Dailis teatrī Daugovpiļs teatris gasteis ar treis izruodem: tragikomiskim stuostim “Svešie svētki”, psihologisku kriminaldramu “Bīstamais pagrieziens” i komedeju “Ekstrasensa cīņa”. Sovukuort iz Latvejis Nacionaluo teatra skotivis Daugovpiļs teatris gasteis ar div izruodem: vīna nu tūs ir režisora Dž. Dž. Džilindžera izruode “Iemīlējās muļķis muļķītē”, nu ūtrei – Latgolys kongresa symtgadei veļteits īstudiejums “Nūgrymušo pile”, kuram Latvejis Nacionalajā teatrī tei byus ūtrei pyrmizruode.

Jau 2. martā 19.00 Dailis teatra skateituojim byus vareiba nūsavērt izruodi “Svešie svētki”, kas ir latvīšu dramaturgis Agnesis Rutkēvičys stuostu īstudiejums Paulys Pļavniecis režijā. Juoatzeimej, ka par izruodis “Svešie svētki” dramaturgeju Agnese Rutkēviča tyka nomināta “Spēlmaņu nakts” bolvai kategorejā Goda sasnāgums originaldramaturgejā.

Sovukuort 3. martā 19.00 skateituojus sagaideis spraiga angļu dramaturga Džona Bointona Prīstlija kriminaldrama “Bīstamais pagrieziens” (rež. O.Šapošnikovs), kurymā eistu detektivu gorā teik izmaklāts kaida seneja paguotnis nūtikšona.

Daugovpiļs teatra gostu izruodis Dailis teatrī nūslēgs aizraujūša komedeja “Ekstrasensa cīņa” (rež. I. Lūsis) ar jūku meistaru Juoni Jarānu amizanta ekstrasensa lūmā. Izruode nūtiks 19. martā 15.00.

19. aprelī iz Latvejis Nacionaluo teatra skotivis varēs nūsavērt režisora Dž. Dž. Džilindžera īstudiejumu “Iemīlējās muļķis muļķītē”, kurs sovu pyrmizruodi pīdzeivuojs pavysam naseņ, nu jau paspiejs īmontuot Latgolys skateituoju navyltuotu mīlesteibu. Titullūmuos Latvejā zynomais akters Andris Bulis i Daugovpiļs teatra jaunuo aktrise Zanda Mankopa.

Daugovpiļs teatra dīnys Reigā nūslēgs Latgolys kongresa symtgadei veļteits muzykals īstudiejums latgaliski “Nūgrymušo pile”. Tuo pyrmizruode nūtiks 6. majā Daugovpiļs teatrī, bet jau 15. majā tū varēs nūsavērt Latvejis Nacionalajā teatrī. Izruodis rodūšajā komandā ir vairuoki zynomi muokslinīki: komponists Kārlis Lācis, horeografs Agris Danilevičs, akteri Juoņs Jarāns i Jurijs Djakonovs. Īstudiejumā pīsadaleis ari Daugovpiļs kors “Daugava” Jevgenija Ustinskova vadeibā.

Beleti – “Biļešu paradīzes” kasēs i škārsteiklā

Kartenis autore: Džeina Saulīte

Komentari slāgti.