Bīdreiba “Latgolys Studentu centrs” aicynoj īsasaisteit gruomotys izdūšonā

LaKuGa 9. Juļs, 2017. gods 1

Latgalīši ir izslavāti na viņ ar sovu sirsneibu, lobsirdeibu i vīsmīleibu, nu ari ar cīši lobu humora izjiutu. Tū apsazynojūt, bīdreiba “Latgolys Studentu centrs” (LgSC) ar bīdreibys “LR” atbolstu ituo gods rudinī planavoj izdūt suleigu latgalīšu humora apkūpuojumu gruomotā “Kas bez bikšu — tys bez bādu!”.

Kuldys formata gruomotā tiks apkūpuota latgalīšu myusu dīnu mutvuordu folklora – izteicīni, jūki, anekdoti, tosti, loba vieliejumi, kū sevkurs skaiteituojs vareis izmontuot kai špikeri svātkūs ci puorskaiteit kasdīnā lobuokam nūskaņuojumam. Teksti byus papyldynuoti ar karteņom i ilustracejom.

Sevkurs zyna, ka latgalīšim ir eipaša humora izjiuta, kurā mozi navaineigi jūceni mejās ar izsmalcynuotu sarkasmu i pat ar malnū humoru. Paraleli stuostu i anekdotu gruomotam, kuruos niu daīmamys, LgSC skaiteituojim grib pīduovuot taišni apleicejūs cylvāku izteicīņus, gadīņus nu dzeivis, tostus i loba vieliejumus, kas kasdīnā teik lītuoti i ir aktuali. Par pīvadumu, nazkod ļauds smējēs, ka vysta na putyns, a buoba na cylvāks. Niu, lai vystys sēd loktā i diej ūlys, partū ka: “Opeļs nav mašyna, buoba nav cylvāks!”. Voi navys “Lobuok vāluok kai nikod”, bet “Lobuok vāluok kai veļ vāluok…”. Ci veļ pīvadumam: “Cik gryuts ir byut latvīšam, ka naesi latgalīts!”.

LgSC jaunīši jau ir salasejuši pusi nu gruomotys satura – pīrakstejuši sasaglobuojušus vacus, jaunus jūkus, izteicīņus i cytys. Grybam pasaceit lelu paļdis rodim, draugim i vysim tim, kas pasadaleja ar sovim jūkim i izteicīnim, syutūt e-postus, sms, sasateikūt i zvonūt, kai ari tim, kuri pasadaleja sovuos modernuos mutvuordu foklorys zynuošonuos Latgolys symtgadis kongresa nūtikšonu laikā Rēzeknē.

Tai kai gruomotā grybam likt jūkus (tostus i loba vielejumus), kas ir aktuali i teik kasdīnā lītuoti, aicynojam sevkuru, kam nav svešs eistyns i suleigs latgalīšu humors, īt tolkā LgSC i īsyuteit kaidu gordu jūku, frāzi, izteicīni, anekdotu, ci vieliejumu, kab kūpeigim spākim saglobuoti myusu laika humora pērlis.

Informaceju lyudzam syuteit iz e-postu daugovpils@lgsc.lv.

  • Armands Kociņš Kūceņš

    Latgaliski – “Kas bez iuzu, tys bez bādu…”. Vuords “bikses” Latgolā īguoja padūmu (PSRS) laikā.