Reigā byus apsaverama Pīgožņa bolvys pretendentu izstuode

Reigā byus apsaverama Pīgožņa bolvys pretendentu izstuode

Rokstu sagataveja: portals lakuga.lv

Nu 20. marta da 21. apreļa Reigys Sv. Pītera bazneicā byus apsaverama izstuode “Jāzepa Pīgožņa balva Latvijas ainavu glezniecībā”. Itūgod žureja izstuodei nu 195 muokslinīku viertiešonai padūtūs 359 muokslys dorbu atlaseja 88 autoru 110 dorbus. Golvonuos bolvys pretendenti tiks paziņuoti ituos izstuodis atkluošonā, a golvonuos bolvys īgiviejs byus zynoms septembrī izstuodis atkluošonā Preiļu Viesturis un lītiškuos muokslys muzejā, informej Reigys Sv. Pītera bazneicys puorvaļdis projektu vadeituoja.

Padūtūs dorbus vērtēja: žurejis priekšsēdētājs, muokslinīks Jānis Plivda, Pīgožņa bolvys golvonuos bolvys laureats 2018. godā, Muokslys akademejis Latgolys filialis vadeituoja Ilma Šteinberga, Preiļu Viesturis un lītiškuos muokslys muzeja ekspoziceju i izstuožu kuratore Silvija Berezovska, Leontīne Pīgozne i muokslinīki – Jānis Anmanis, Jānis Strupulis i Agnija Ģērmane.

Konkursā beja varams dasaceit muokslys dorbus, kas atainoj Latvejis dobu, tai veicynojūt muokslinīku interesi izceļt Latvejis ainovys gleznīceibys nūzeimi myusu dīnu muokslā.

2015. godā “Jāzepa Pīgožņa balvas Latvijas ainavu glezniecībā” padūšonu īdybynuoja Reigys dūme i Preiļu nūvoda dūme sadarbeibā ar Reigys pošvaļdeibys kulturys īstuožu apvīneibys Reigys Sv. Pītera bazneicys puorvaļdi, Preiļu Viesturis un lītiškuos muokslys muzeju, Latvejis Zynuotņu akademeju, Latvejis Muokslys akademeju, Jāņa Anmaņa Jaunūs talantu atbolsta fondu i idejis autorim – kinorežisoru i gleznuotuoju Jāni Streiču, muokslinīkim Jāni Anmani iJāni Strupuli. 2015. godā golvonū bolvu sajēme Latvejis Universitatis profesors, muokslinīks Roberts Muzis, 2016. godā – muokslineica Silva Linarte, 2017. godā – muokslinīks Aldis Kļaviņš, 2018. godā – muokslinīks Jānis Plivda.

Nūtikšonu kalendars