Rēzeknē storptautyskuo zynuotniskuo konference “Inflantīši”
Rokstu sagataveja: portals lakuga.lv
13. i 14. junī Rēzeknis Tehnologeju akademejā (RTA) nūtiks storptautyskuo zynuotniskuo konference “Inflantīši: latvīšu i pūļu literaturys, volūdys i kulturys sakari 19. i 20. godu symtā”. Konferenci sadarbeibā ar RTA organizej Pūlejis Zynuotņu akademejis Slavistikys instituts, Belostokys Universitatis filologiskūs pietejumu katedra “Austrumi–Rītumi” i Lukaša Gurnicka vuordā nūsauktuo Podlasejis biblioteka Pūlejā.
Konferencē vysaidu vaļstu zynuotnīki diskutēs par taidom temom: latvīšu i pūļu literaturys, volūdys i kulturys sovstarpejuo ītekme; pūļu izceļsmis rakstnīki (rakstneicys) Latvejā; pūļa atainuojums latvīšu literaturā/ latvīša atainuojums pūļu literaturā; pūļu i latvīšu volūdys konteksti; Latvejis i latvīšu atainuojums pūļu kulturā; Stefanejis Uļanovskys dzeive i dailrade; Pūlejis žurnali myusdīnu Latvejis i Leitovys teritorejā; Leitovys i Igaunejis inflantīšu kulturys konteksti; Latvejis tāla transformacejis 19. i 20. godu symta pietejumūs Pūlejā.
13. junī 9.10 stuņdēs paradzāta konferencis atkluošona 124. auditorejā. Nu pyrmuos dīnys referatu kai interesantuokī Latgolys kontekstā byutu atzeimojami itaidi referati: Dorotys Rembiševskys par lobys izavesšonys pazeimem S. Uļanovskys stuostūs; Vladislava Malahovska par pūļa tālu latgalīšu laikrokstūs (1920–1934); Antrys Kļavinskys par nazynuotniskim prīškstotim par pūļu volūdu Latgolā. Mārīte Šakina referēs par muižnīku Uļanovsku pādim Zīmeļlatgolā, Henriks Petkevičs – par latvīša i pūļa attāluojumu boltkrīvu folklorā.
Ūtruos dīnys referatūs pīsaista jau pazeistamys temys – Jaroslavs Lavskis referēs par 19. g. s. inflantim i Andžejs Ratajs par S. Uļanovsku. Sovutīs Anna Vydrycka atkluos Latgolā nazynomū rakstneicu nu Pušys Stanislavu Šadursku.
