LgSC janvars Rēzeknē

Tai jau soka, ka studenti vuicūtīs div reizis godā – sesejis laikā. Paraleli vuiceibom mes – LgSC Rēzeknis nūdalis studenti – asom atroduši laiku pīsadaleit vairuokūs pasuocīņūs.

Jauns gods juosuok ar jaunom, pozitivom dūmom deļ tam 15. janvārī LgSC Rēzeknis nūdale aicynova interesentus iz pozitivuos dūmuošonys centra „Pavasara studija” seminarim „Es esmu savas dzīves autors” i „Nauda un bagātība”. Seminara laikā dalinīki poši varēja aizadūmuot par tū, kaidu dzeivi poši dzeivoj, voi jei ir taida, kaidu gribīs. I kū dariet kab varātu dzeivuot laimeiguok. Ūtramā seminarā varejom dūmuot i runuot par naudu i boguoteibu. Kai pīvylynuot naudu sev, kū ar jū dareit, lai jei nastu prīku i gondarejumu.

20. janvarī Latgolys Studentu centra bīdri i draugi pīsadaleja 1991. goda barikažu atceris 20. godadīnai veļteitajā pasuocīņā „Laipu liekot…”, kuru organizēja Latgolys Kuļturviesturis muzejs. Pasuocīņā eipošu nūskaņu padareja LgSC aktivistis Ilzis Bojāris stuosts par barikāžu laiku sovā saimē, par muotis stuosteitū pošys pīdzimšonys breinumu. Cyti LgSC draugi skaiteja Imanta Zīdūņa ailis, RA studente Zaiga dzīdova Īvys Akurateris dzīsmi „Manai tautai”. Ar sovim īspaidim par pasuocīni dalejuos LgSC aktīviste Vita Ruseņa: „Uorā nabeja sylts, bez cimdim sola rūkys, bet tys myusim natrauceja baudeit pasuocīni. Muzykanti spieleja pazeistamys dzīsmis, kab mes – klauseitoji varātu sasadzīduot vysi kupā. Beja pateikami, ka varējom cīnuotīs ar piparmātru čaju i capumim. Lai byutu veļ syltuoks tika īkurynuots guņskurs ap kuru mes vysi sasaspīdušīs sildejomīs. Klauseitoji beja vysu vacumpūsmu nu mozim bārnim, kuri vēļ nimoz nanūjauta kū jī ite dora, leidz pat vacim siermgolvim, kuri daļejuos ar myusim sovūs stuostūs par barikažu laiku. Vāluok mes tikom aicynoti īškā muzejā, tī varejom apsaviert tuo laika biļdis”.

Tymā pat laikā cyti LgSC aktīvisti pīsadaleja programmys Jaunatne darbībā reikuotajā apvuiceibā „Coaching jauniešu iniciatīvas projektos”. Seminars nūtyka Ūgrisgolā, vīsu sātā „Debesu bļoda”. Četru dīnu laikā beja īspieja īsavuiceit i saprast, kas ir jaunīšu iniciativu projekti, kaida ir tūs specifika. Kas ir i kas nav inovaceja, kai projekts juoroksta, lai tys tyktu atbaļsteits. Vysam semināram cauri vejuos naformaluos izgleiteibys vuiceibu metodis, runuošona, dorbuošonuos grupuos. Apvuiceibu laikā dalinīkim roduos jaunys idejis par jaunim projektim i jaunim pasuokumim.

Tai kai studenti ir lusteigi ļauds i zīma itūgod bogota ar snīgu, 26. janvārī LgSC bīdri i jūs draugi brauce iz Lido kolnu baudiet zīmys prīkus. Kurš slāpova, kurš snovova, kurš šliuce iz gumejis pyušļa, kotram sova nūdarbe i sova prīca. Latgalīši ir drūsmeigi ļauds, pyrmajā slāpuošonys reizē pruoveja nūbraukt nu poša augšuokuo kolna ar dūmu, ka vyss saīs ideali. Varbyut tai ari vajag mestīs vysā jaunajā nasabeistūt, ka var nūkrist, vinmār byus kaids, kas pīcels i paleidzeis. Stuovūt kolna zamuškā navar redzeit i sajust tuo, kas radzams nu viersyunes. Aktiva atpyuta ir lobuokuo nūdarbe, kas satyvinoj cylvākus, deļ tam ir planavuots koč kod febrarī braukt baudeit zīmys prīkus otkoņ.

Tai eisai par myusu aktivitatem janavarī, prūtams, tam vysam pa vydu ari sasatikšonys birojā, sarunys, kūpā byušona. Ari februars myusim izaver latgaliskim nūtykumim boguots. Teikomēs pasuokumūs i kasdīnā!

LgSC Rēzeknis biroja vadeituoja Dagneja i LgSC draugi

 

Bīdreibys 2008.- 2011. goda darbeibys programu atbolsta Islande, Lihtenšteina i Norvegeja EEZ finanšu instrumenta i Norvegejis finanšu instrumenta ītvorūs, i Latvejis vaļsts ar Sabīdreibys integracejis fonda storpnīceibu.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]