Lāmumu pīsadaleit Baltejis Gruomotu svātkūs Latgolys studenti pījāmušs piec veiksmeiguos daleibys Reigys Gruomotu svātkūs 2010. goda novembrī, kod interesi par latgalīšu gruomotom izruodeja cīši daudz skaiteituoju i sabīdreiba ari piec tom beja jiutams pīprasejums. Baltejis Gruomotu svātkūs bīdreiba pīduovuos vēļ plašuoku gruomotu kluostu, kas saguoduots, sasadorbojūt ar vairuokim Latvejis apguodim.

“Daleiba izstuodē byus mieginuojums vīnuvīt pīduovuot dažaidu Latvejis izdevieju gruomotys, kas izdūtys latgaliski ci ari runoj par Latgolu, tuos kulturys dažaideibu i cylvākim. Sadarbeibā ar dažaidim izdeviejim censsimīs dareit pīeimamus itūs izdavumus, tai dūdūt īspieju skaiteituojim vīnuvīt īsapazeit ar “cytu latvīšu literaturu” i paplašinuot sovu redzislūku par Latgolu”, stuosta bīdreibys “Latgolys Studentu centrs” vaļdis prīšksādātuoja Ilze Sperga.

Bīdreibys “Latgolys Studentu centrs” latgalīšu gruomotu golds Baltejis Gruomotu svātkūs tiks pīduovuots pyrmū reizi.

19. martā Reigā byus īspieja satikt ari latgalīšu autorus – nūtiks gruomotys „Es soku.Tu soki. Puorsokys par krīzi” prezentaceja i cikla „Cyti godalaiki” literari muzykalais pasuocīņs „Agrais pavasars”.

“Baltejis gruomotu svātkus” organizej Starptautiskuo izstuožu reikuotuojbīdreiba “BT 1” sadarbeibā ar Latvejis Gruomotnīki gildi i Latvejis Gruomotizdevieju asociaceju.

Starptautiskajā izstuožu centrā Kīpsolā reizē nūtiks ari starptautiskuo izgleiteibys izstuode “Škola 2011”.

“Baltejis gruomotu svātku 2011” dorba laiks:
3.–5. marts 10.00–18.00
6. marts 10.00–17.00

Biletis cena: Ls 0,50
Pensionarim i ivalidim, uzruodūt aplīceibys, kai ari bārnim leidz 7 godu vacumam īeja izstuodē ir bez moskys. Ar izstuodis “Škola 2011” bileti īeja “Baltejis gruomotu svātkūs 2011” – bez moksas

Vaira informacejis: http://www.bt1.lv/bt1/lbf/?link=00000000&subid=1261