Šudiņ paskaiteju CV

Asu tik studente, vēļ naasu nivīnam bejuse dorba devēja, naasu pījiemuse kaida CV. Vys tik te tys ir – stuov iz muna golda: „Latgalieša CV no seniem laikiem līdz mūsdienām”*. ,,Latgalieša” – taitod ari muns, Tovs, lauku babenis i … .

,,Latgalieša CV” pīsaista ar vuoka nūformejumu – tys ir tik boguots i daudzveideigs kai latgalīša dvēsele. Kūka bazneiceņa i speideigs gaisa balons, senejīs karaveirs, kurs par sovim izskotim i breiveibu ceinejīs ar zūbynu, i myusdīnu cylvāks (Sovvaļnīks), kam zūbyna vītā gitara (var redzēt, ka pasauļs vys tik lobuoks palics). Centrā gūda vītā starks (živrejs, batjans) – sātys svieteibys simbols. Voi ari autori tyc, ka jis atnas bārnus? Voi na deļ pasaļaušonuos iz itū putynu īdzeivuotoju Latgolā palīk mozuok i mozuok? …

Gruomatenis saturs ir tikpoš daudzveideigs, kai tuos vuoks. Kai jau CV pīsanuok, gruomota suokumā īpazeistynoj ar latgalīša vuordu i dzimšonys vītu.

Beju dīzgon puorsteigta, izzynūt, ka apzeimejums „latgalieši” pastuov viņ nu 20.gs., koč i beju dzierdejuse, ka latgalīši Sibirī sauc sevi par latvīšim. Kod jī aizbrauce, sova nūsaukuma Latgolys latvīšim tok nabeja, golu golā vysys latvīšu tautys vuords guojs nu Latgolys.

CV mināti golvanī fakti nu Latgolys viesturis. Es dūmoju, ka te dyžan labi īsadarātu vēļ puora teikumi par Jersiku – vīneigū veidojumu tūreizejuos Latvejis teritorejā, kū varātu nūsaukt par vaļsti. Vacajuos hronikuos taišņi Jersikys vaļdnīks vīneigais nu latvīšu ciļtim nūsaukts par rex- karali.

Interesants atkluojums maņ beja Latgolys karūga pyrmsuokumu saisteiba ar vaļsts policejis aktivitatem i tys, ka leidz 1935. godam vyds izlūksni (tāņ oficialū latvīšu volūdu) vuicieja viņ kai atsevišķu prīkšmatu.

Nūdereiga ir eisuo pavuiceiba latgalīšu volūdā – tabula ar golvonajom fonetiskajom atšķireibom .

I par myusu dīnom: ka izroksti latgaliski Latgolā puorsvorā sastūpami tikai grafiti veidā, i daudzys interesantys lītys par Latgolys Radeju, Borowu MC, Bez PVN i cytom latgalīšu grupom.

„Latgalieša CV no seniem laikiem līdz mūsdienām” byus loba duovona gostim nu cytim nūvodim i vaļstim. Tys ir izdūts ari angļu un krīvu volūduos. Tai pat īsoku puorskaiteit ari kotram pošam, kai atguodynuojumu par tū, cik daudzi vierteigu lītu, vītu i cylvāku ir Latgolā.

A cytā reizē, kod byusi Rēzeknē, naaizmiersti aizīt iz kopejneicu „Muols”!

CV puorskaiteits, latgalīts – senejīs i muns laikabīdrs – īpazeits. Secynuojumi?

Pījimt latgalīti dorbā volūdys i kulturys saglobuošonai i Latgalys vyspuoreigai atteisteišonai! Veiksmi dorbā!

Dzintra

* “Latgalieša CV no seniem laikiem līdz mūsdienām” autori ir Rēzeknis Augstškolys pietnīki i tys plašuokai auditorejai prezentēts ituo gods junī. Izdavuma pamatadresats ir Latgolys gosti, kab dziļuok īsapazeitu ar Latgolys kulturu, viesturi, geografeju, literaturu, latgalīšu volūdu nu sanlaikim da aktualuokajom tendencem 21. godusymtā. Izdavums pīejams latvīšu, krīvu i angļu volūdā.

Print Friendly, PDF & Email

Komentari

Nūtikšonu kalendars

Nov
7
Sai
16:00 Catūrtais pasauļa diktats latgal... @ Vyss pasauļs
Catūrtais pasauļa diktats latgal... @ Vyss pasauļs
Nov 7 @ 16:00
Catūrtais pasauļa diktats latgalīšu rokstu volūdā @ Vyss pasauļs
Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs[...]