Latgaliskī pīskuorīni latvyskā Latvejā

Nūsasliedzs Latgolys Studentu centra izsludynuotais bārnu i jaunīšu patriotiskū dorbu konkurss „Sorkonboltsorkonuos kruosys lai zīd!” Konkursa moto ir latgalīšu dzejnīka Augusta Egluoja dzejūļs ar taidu pošu nūsaukumu.

Paļdis vysim školuotuojim i jaunīšim, kas paleidzēja izplateit informaceju Latgolys školuos i jūs sātyslopuos! Paļdis vysim dorbu autorim! Prīca, ka nanūsabeidot raksteit latgaliski.

Golvonū bolvu īgiust Aglyunys nūvoda Aglyunys internatvydsškolys 11. klasis škoļneica Anda Abuže par eseju „Latgola – muna paradīze”. Školuotuoja Anita Vaivode.

Anda bogotā i tālainā volūdā aproksta, kai Latgolā mejās godalaiki i kotrys nu jūs nas sev leidza sovu skaistumu: Saulis stareņš spielejās ryusgonajūs pakolnūs. Nūkreit pa ratai snīga puorslai. Otkon par Latveju, par munu mozū paradizi, pleivoj sorkonboltsorkons karūgs, kas aicynoj atguoduot paguotni, tāvu i vactāvu pīdzeivuotū, pasaceit jim paļdis par tū, ka asu dzymuse i varu dzeivuot i vuiceitīs breivā vaļstī, redzēt, dzierdēt, sajust i prīcuotīs par tū, kū čukst piedejuo lopa ūzula zorā, kū izklīdz dziervis iz syltuom zemem lidojūšā kuosī.

Pi vīna var pasaceit, ka Andys literaruo puosoka „Ūzulkolna stuosts” ir publiceita LgSC izdūtajā gruomotā „Es soku. Tu soki. Puosokys par krīzi”.

Jurs Laizāns nu Drycanu vydškolys 8. klasis īgiust veicynuošonys bolvu par dzejūli „Muns lapnums”, kurā stuosta par ceļuojumu pa Latveju i atsagrīzšonu sātā, kur var īt pa sovu stidzeņu i satikt sābri. Školuotuoja Velta Adijāne.

Obeju apbolvuotūs dorbu autori īgiust kotrys pa div biletim iz 20. novembra Latvejis Nacionaluo teatra izruodi „Latgola.lv” i īspieju izavieleit duovonys bīdreibys „Latgolys Studentu centrs” latgalīšu muzykys disku i gruomotu goldā: Anda Ls 20 i Jurs Ls 15 vierteibā. Školuotuojom Anitai Vaivodei i Veltai Adijānei lels paļdis i īspieja LgSC bolvu kluostā atrast kū nabejs deļ seve par Ls 5. Ar bolvu īgiviejim sasazynuosim e-postā. Naskaidreibu gadejumā raksteit ilze@lgsc.lv

Konkursa dorbus LaKuGā varēs puorskaiteit 17. novembrī.

Print Friendly, PDF & Email

Komentari

Nūtikšonu kalendars

Nov
7
Sai
16:00 Catūrtais pasauļa diktats latgal... @ Vyss pasauļs
Catūrtais pasauļa diktats latgal... @ Vyss pasauļs
Nov 7 @ 16:00
Catūrtais pasauļa diktats latgalīšu rokstu volūdā @ Vyss pasauļs
Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs[...]