Svīksts Nr. 4 / + KONKURSS

Ar kū sevi īprīcynuot iz Latvejis dzimšonys dīnu? Varbyut ar latvīšu tautys muzyku? Kotru puorgodu izīt myusdīnu tautys muzykys izlase SVĪKSTS (SVIESTS) i kai reizi poša jaunuokuo ar numeri IV ir izguojuse napaseņ. Izlase snīdz klauseituojim īskotu, kas tod nūteik latvīšu myusdīnu tautys muzykys lauceņā – pīruodūt, cik skaista, dažaida, skaneiga, instrumentala i moderna tei var byut ari 21. godu symtā.

SVĪKSTS ir pylns da molu – albumā īkļautys vasalys 22 dzīsmis dažaidu grupu i kūpprojektu izpiļdejumā, kuru vydā natryukst ari tautys muzykys izpiļdeituoju i aktivistu nu Latgolys. Sūpluok “Iļgim”, “Laiksnei”, “Lānam” i cytim pazeistamim i pavysam jauniem izpiļdeituojim sovu vītu atroduši “Krampis” ar “Kuopu, kuopu kolnā”, “Vīteri” ar “As beju muotei vīneiguo meita”, “Ilža” ar “Skaista muižeņa”, etnomuzykologis Liene Brence i Aiga Sprindža ar “Vysu dīnu jumi jiemu”, kai ari Leivuonu “Ceiruleiša” puorstuovi i dalinīki dažaidu projektu sastuovūs, eipaši atzeimejūt grupu “Folkvakars” i sadarbeibys projektu “Austris Grasis un draugi” ar “Doncuot guoju ar meitom”. Latgaliski dzīž na viņ latgalīši, bet ari reidzinīki – jaunīšu folklorys kūpa “Rudzi” latgaliski īdzīduojuši dzīsmi “Kur tu skrīsi”.

KRAMPIS

Folkgrupa, kas jau puora godus dorbojuos Leivuonūs. Puorsvorā izmontoj tautys muzykys motīvus, tūs aranžejūt sovā manīrē.

KRAMPIS – KUOPU, KUOPU KOLNĀ

VĪTERI

Jaunīšu grupa nu Rēzeknis, kura izaceļ ar rodūšu i dzeivisprīceigu tautys muzykys interpretaceju. Vīterim eipaši rakstureiga ir spēja koncertūs radiet napīspīstu i draudzeigu kontaktu ar skateituojim.

ILŽA

Latgalīšu tautys muzykys kapela nu Ciblys. Ilža dorbojas nu jau vaira kai 20 godu, veidojūt repertuaru nu sovys apleicīnis dzīsmem, dančim i tradicejom. Klauseituojus koncertūs aizraun ar sovu latgalisku nasamuoksluoteibu i eistumu.

LIENE BRENCE I AIGA SPRINDŽA

Etnomuzykologejis studenti Latvejā na viņ apgiust teoretiskys zynuošonys, bet ari poši aktīvi muzicej. Jaunī etnomuzykologi bīži sastūpomi muzicejūt dažaidūs sastuovūs, eksperimentejūt ar tautys muzykys motivim. Itymā albumā īkļauta Līnis i Aigys verseja par Jumja dzeišonu.

AUSTRIS GRASIS I DRAUGI

Austris Grasis ir vīns nu latvīšu folklorys kusteibys īdybynuotuojim Vuocejā jau septeņdasmitajūs godūs. Puorsacieļs iz Latveju, jis turpynoj aktivi muzicēt i pīsadaleit vysdažaiduokajuos folkloristu nūrisēs. Austris Grasis pamatuoti izskota, ka tautys muzykys grupys Latvejā napelneiti damiersušs taidu instrumentu kai klarnete. Itymā īrokstā Austra klarnete ir labi dzierdama. Īrokstā pīsadola Austra draui nu Leivuonim, pazeistamī folkmuziki – Edgars Kārklis, Kristīne Kārkle-Puriņa i Gatis Valters.

.

Albumu sovā eipašumā vari īgiut divejūs veidus:

1) Nūpārkūt kaidā nu tierdznīceibys vītom Reigā (Upe, Randoms i.c.) voi ari pārkūt škārsteikla veikalā LAUSKA (Latgolā Dīvam žāļ veikalūs albums nav atrūnoms), kur pasyutūt, albumu sajimsi pa postu (vyss pasyutejuma i pīguodis process teik padareits nedelis laikā).

2) Pīsadolūt konkursā ite poš LaKuGā

.

.
KONKURSS!

Atbiļdi pareizi iz vaicuojumim, syuti atbiļdis iz e-postu info@lakuga.lv leidz 18. novembrim i esi vīns nu 3 laimeigajim (vīns pyrmuos pareizuos atbildis autors i diveji, kam pasaveiks ar izlūzi), kas sajims jaunū myusdīnu tautys muzykys izlasi “SVIESTS IV” Rezultati 21. novembrī LaKuGā.

1. Par kaidu putynu dzīsmē “Kur tu skrīsi” dzīž jaunīšu folklorys ansamblis “Rudzi”?

A kraukleiti

B vanadzeņu

C zeili

2. Kurys latgalīšu folklorys grupys vasalus divejus albumus ir izdevs kulturys menedžmenta centrs “Lauska”?

A Ilžys

B Svātrys

C Laimys muzykantu

3. Kaidus veirus sovā dzīsmē “As beju muotei vīneiguo meita” naīsoka precēt “Vīteri”?

A juvelirus

B dzāruojus

C peipmaņus

Lels paļdis kulturys menedžmenta centram “Lauska” par sadarbeibu!

.

.

.

.

Print Friendly, PDF & Email

Komentari

Nūtikšonu kalendars

Nov
7
Sai
16:00 Catūrtais pasauļa diktats latgal... @ Vyss pasauļs
Catūrtais pasauļa diktats latgal... @ Vyss pasauļs
Nov 7 @ 16:00
Catūrtais pasauļa diktats latgalīšu rokstu volūdā @ Vyss pasauļs
Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs[...]