DU sasateik dzejnīki, rakstnīki, muzykanti

Nu 7. leidz 11. novembram Daugpiļs Universitetā (DU) nūtyka jau 6. Daugpiļs Zynuotnis festivals, kas itū reizi beja veļteits Daugpiļs Universiteta 90 godu jubilejai. Vysi DU studejūšī i struodojūši ļauds 10. novembrī 4 stuņdēs, Paradis ūļneicā 1 beja aicynuoti iz litararu pasuokumu „Brīvais Mikrafons”. Sovu dzeju beja atguojuši skaiteit jauni i jau atzeiti dzejnīki.

Pasuokuma dalinīki i klauseituoji tyka sasādynuoti rynčī iz zala skotuvis. Ar sorkonom lampom tyka radeita taida klusa pustymsa. Roduos siermuos stuņdis sajiuta, kod vysi apsadarejuši atsasiede vīnā ustobā i klusai, mīreigai puorrunova dīnys nūtykumus, puordzeivojumus, sajiutys. Ari ite mes sasatykom, lai pasadaleitu ar sovom sajyutom, dūmom – pīraksteitom dzejis formā.

Pyrmuo ar sovu dzeju dalejuos dzejneica Egita Terēze Jonāne, jei cytus īpazeistynova ar sovu dzejulu – haiku gruomatenu „Tikšanās uz siržu laipas. Trīspuksti”. Gruomoteņai asūt trejis dalis, vīnā jei roksta par cylvāku i Dīvu, ūtrā – par cylvāku i cytu cylvāku, a trešā – par cylvāku i juo attīksmi pret sevi. Juos dzejuļu skaitejumu cīši labi papyldynova Edgara Klusa gitarys skanis.

Tod sovu dzeju skaiteja Sergejs Žukovs, juo dzejā pasaruoda romantisma motivi, skaistai i gleznainai jis aproksta Kruoslovu. Smaidu sejā roda juo poema par gauliņom.

Zaiga Lāce roksta par sovom sajyutam, puordzeivuotū, dzeja atajūt bīži lekceju laikā, i jei nanūsamīrejūt, cikom nadarokstūt da gola. Kai pādejū jei skaita nanūpītnu dzejuli par sābru Baibu.

Atsasaucūt iz tū, ka sovulaik raksteju ar pseidonimu Baiba (tagad – Dagneja), eimu skaiteit sovu dzeju par cylvākim, sajyutom, attīceibom. Nūbeigumā ar dzejuli vieleju, lai vysim byutu kaids meils cylvāks, kurš vysmoz pasoka kaidu lobu vuordu.

Tod izastuoja Oļesja Teivāne, jei sadalejuse sovu jaunradi trejūs pūsmūs – pamatškolys, vydškolys i studeju laiki. Jei mums skaita vydškolys laikā saraksteitu poemu par mīlesteibu, tod studeju laikā saraksteituos tragedejis golvonuo varūņa monologa fragmentus. Sovu skaiteišonu nūslādz ar skaistu dzejuli par sovu meilū – tagad jau veiru.

Sovu dzeju skaita jau atzeitais latgalīšu literats, DU docents Valnetins Lukaševics. Iz lyugumu pakomenteit cytu dalinīku skaiteitū, Valentins atsoka, ka nagryb nikuo saceit, ar laiku vyss mainūtīs, kas agruok lykuos koč kas augstys klasis, tagad līkās zams – i ūtraižuok. Jis vierš maneibu pi tuo, ka latgalīšu dzejai, prozai, pasuokumim vajag vaira reklamys, vaira struoduot pi menedžmenta. Dzejuli jam kai vīnmār: nagari, ritmiski, posmodernisma stilā īturāti.

Piec dzejis skaiteišonys vysi kūpā ar korsta čaja krušku rūkā, puorrunojam skaiteitū, aizdūdam vaicojumus dzejnīkim, skateituojim, pasuokuma reikuotuojim. Nūsprīžam, ka taidus pasuokumus vajadzātu reikuot bīžuok. Paļdis organizatorim M. Burimai, E. Kasparenokai i 2. kursa filologejis studentim

Dagneja

Biļdis nu pasuocīņa: foto Zanda Lazdāne


Print Friendly, PDF & Email

Komentari

Kalenders

Jun
15
Sai
all-day Gitys Palmys izstuode “Vilcienu ... @ Roberta Mūka muzejs
Gitys Palmys izstuode “Vilcienu ... @ Roberta Mūka muzejs
Jun 15 all-day
Nu 12. apreļa da 15. juņa Roberta Mūka muzejā Gaļānūs apsaverama muokslineicys Gitys Palmys gleznu izstuode “Vilcienu meitenes stāsts”. Izstuodē apsaveramys i vairuoku godu laika periodā radeituos, i publikai īprīšk naparuodeitys, kai ari pavysam jaunys[...]
10:00 Bruņojīs ar zynuošonom. Informat... @ Rēzekne, Kulturys i atpyutys parks
Bruņojīs ar zynuošonom. Informat... @ Rēzekne, Kulturys i atpyutys parks
Jun 15 @ 10:00 – 15:00
Bruņojīs ar zynuošonom. Informativuo dīna @ Rēzekne, Kulturys i atpyutys parks
Informativuo dīna dzeivuotuojim “Bruņojies ar zināšanām”.