Muna Latgola Latvejis duorzā

Kab rūsynuotu školānus i studentus par Latveju i tāvu zemis mīlesteibu dūmuot, runuot i raksteit latgaliski, bīdreiba „Latgolys Studentu centrs” izsludynuoja patriotisku rodūšūs dorbu konkursu „Sorkonboltsorkonuos kruosys lai zīd!”. Konkursā tyka aicynuoti pīsadaleit bārni i jaunīši leidz 30 godu vacumam.

Varbyut kaids nūsabeida nu konkursa nūsacejumu — īsyuteit dorbus latgaliski. Varbyut kuram termeņš pasaruodeja par eisu. Tok nu īsyuteitūs dorbu niu sataisejom izlasi, kū pyrms Latvejis proklamiešonys svātku pīduovojam Lakugys skaiteituojim.

Šudiņ Jurs Laizāns i Viktorija Semule nu Drycānu, Vija Struka nu Rībeņu, Diāna Pīterāne nu Aglyunys. Reit Aglyunys škoļneicys Andys Abužis eseja “Latgola – muna paradīze”.

Muns lapnums

Ar pierkstu pa karti es traucu
I pasaulis plašumūs kleistu.
Tod tāvam blokus mašynā sāstu
Īpazeit Reigu es braucu.
Izbraucu Kūrzemi, Vydzemi,
Zemgali plašū,
Skaistys dobys ainovys radzu
I lobus ļauteņus sveicu…
A sirds mani atpakaļ sauc,
Kur Rāzna i Lubuons sovus viļņus veļ,
Kur Rēzeknis Rūze gaužys osorys lej.
Es laimeigs pa sovu stidzeņu īmu
I sateiku sābri, kas pretim maņ īt.
Smaidūt vīns ūtram mes paspīžam rūku
I lobus vuordus kai duovonu snīdzam.
Sirds muna laimis i prīka piļdeita teik —
Es lapns par sābri i Latgolu sovu.

Jurs Laizāns
Drycanu vydsškolys 8. klase
Školuotuoja Velta Adijāne

Muna Latgola

Latgola! Muna skaisto i breineigo Latgola!
Tu kai pučeite kūša Latvejis duorzā.
Dzydrais azaru zylums.
Iudiņu plašums i lelums.
Vieju stabuļu bolsi te kaisuos,
Putneņu dzīsmenis raisuos.
Latgolys dzīsmeņu jaukums,
Ļauteņu syltums i meilums
Kotru dzimtinis cylvāku apjam
Latgolys sātā i dryvā.
Latgola — muna vysumeiluokuo vīta
Zam zyluo dabasu juma.
Latgola — tev myužam spūžai zvaigzneitei
Latvejis dabasūs byut!

Viktorija Semule
Drycanu vydsškolas 7. klase
Školuotuoja Velta Adijāne

***

Tāvzemeite, dvēseleite muna!
Īvzīdu skurbumā,
Ūzulu stoltumā,
Pļovu i mežu burveibā,
Sorkonboltsorkonuos kruosuos teita,
Cylvāku mīlesteibā tārpta.
Meila kai muomulis smaids,
Stypra kai tāva rūka,
Breiva kai lopa viejā —
Tāvzemeite muna!
Zemis i dorba smogumu jutuse,
Osoru ryugtumu garšuojuse —
Tei tāvzemeite muna,
Kas kai muote sovus bārnus gaida
Nu tuolu i tyveju zemu
Bez nūguruma i ar mīlesteibu.
Tāvzemeite!
Kod kuojis maņ pīkuss —
Guļšūs tev kluot,
Kab spāku i mīlesteibu smaltūs,
Kab tev blokus dzeivuotu.
Kab kliutu par daļu nu teve!

Vija Struka
Rībeņu vydsškola
Školuotuoja Irēna Ormane

Muna laimeiguo sirds

Asu Latgolys bārns — vīna zynuotkuora lapeņa muna skaistuo nūvoda kūkā. Te ir syltuokuos vosorys, kruosainuokī rudiņa vokori, smaržeiguokī i skaneiguokī pavasari, myrdzūšuokuos zīmys — a pa vydu muna sirsneņa — prīceiga kai opolais mienesnīks myužeigajā dabasu skaistumā.
A tod es vēļ izdūmoju pasarunuot ar sauli, partū ka jei speid dzintara lasem kai mads, kas piļ nu boguoteiguos bišu kāris. Nūsagulstu pīniņu pļovā i smaidu — maņ pateik apleik skanūšuo vosorys dobys muzyka.
Asu sprygona i rudinī — tys muns meiluokais godalaiks. Muna cylvākbārna sirsneņa mat prīceigu kiulini, radzūt sudobraini luosumainū skaistumu vysapleik. Es saplyustu ar kruošņajom lopom i kliustu par dobys bārnu. Muna rudiņa gruomateņa ir draiska kai jautruo zvierbuļa skrīšonuos ar vieju.
A zīma, zīmeņa — ak, kas par azartu manī saskrīn! Es varu stuņdem ilgi ceļt sovu snīga piļsātu i aizmierst par nūsolušuo daguna vaimanom, leluo lobuos kuojis piersta syudzeibom i aizdūmeigi suortajom rūzem byudu golūs. Es varu īsadraudzēt ar kotru snīgpuorslu munys sātys pogolmā i sasajust laimeiga par skaistumu, kas elpoj apleik.
Maņ vysod ir patykuse i pavasara rūsynojūšuo elpa. Zaļumeni, putynu ligzdenis, skudru celi, taurineišu dejis, muokūņu smaidi — tys mani īdvesmoj, i es atsaveru skaistumam kai pyrmais prīceigais vyzbuļbārns saulis samīļuotā pīkaļneitē.
Asu laimeiga, ka maņ pīder taida boguoteiba, ka maņ ir tik skaista zemeite, kurā es varu izzīdēt kai kruošņuokuo puosoku puče, ka maņ ir sorkonboltsorkonuo karūga mīreigais pleivuojums, ka maņ ir muna vaļsts i Latgola, kurā es varu sasatikt ar skaistū i patīsū.
Muna sirsneņa turpynoj smaideit!

Diāna Pēterāne
Aglyunys nūvoda Aglyunys internatvydsškolys 11. klase
Školuotuoja Anita Vaivode

1. karteņā konkursa veicynuošonys bolvys īgiviejs drycuonīts Jurs Laizāns.
2., 3. i 4. kartenis autore Ilze Sperga.

Print Friendly, PDF & Email

Komentari

Kalenders

Nov
28
Ūtr
15:00 Serials “Fati II” @ "Forum Cinemas"
Serials “Fati II” @ "Forum Cinemas"
Nov 28 @ 15:00 – 16:30
Ūtrajā sezonā redziesi –  Školuotuoji Pīters i Vitaļs sviņ vosorys atvalinuojuma suokšonūs. Obeji izdūmoj braukt da rodim iz Buozovu i pīsapelneit vosorys dorbūs. Školuotuoji teik izmytynuoti cīmā pazeistamuo, bet nu jau myrušuo bitinīka Modesta sātā.[...]
18:15 Serials “Fati II” @ "Forum Cinemas"
Serials “Fati II” @ "Forum Cinemas"
Nov 28 @ 18:15 – 19:45
Ūtrajā sezonā redziesi –  Školuotuoji Pīters i Vitaļs sviņ vosorys atvalinuojuma suokšonūs. Obeji izdūmoj braukt da rodim iz Buozovu i pīsapelneit vosorys dorbūs. Školuotuoji teik izmytynuoti cīmā pazeistamuo, bet nu jau myrušuo bitinīka Modesta sātā.[...]
18:30 Serials “Fati II” @ Apollo Kino Akropole Rīga
Serials “Fati II” @ Apollo Kino Akropole Rīga
Nov 28 @ 18:30 – 20:00
Ūtrajā sezonā redziesi –  Školuotuoji Pīters i Vitaļs sviņ vosorys atvalinuojuma suokšonūs. Obeji izdūmoj braukt da rodim iz Buozovu i pīsapelneit vosorys dorbūs. Školuotuoji teik izmytynuoti cīmā pazeistamuo, bet nu jau myrušuo bitinīka Modesta sātā.[...]
21:30 Serials “Fati II” @ "Cinamon"
Serials “Fati II” @ "Cinamon"
Nov 28 @ 21:30 – 23:00
Ūtrajā sezonā redziesi –  Školuotuoji Pīters i Vitaļs sviņ vosorys atvalinuojuma suokšonūs. Obeji izdūmoj braukt da rodim iz Buozovu i pīsapelneit vosorys dorbūs. Školuotuoji teik izmytynuoti cīmā pazeistamuo, bet nu jau myrušuo bitinīka Modesta sātā.[...]