Dzeivisgudri ļauds soka, ka sapyni mādz pīsapiļdeit. Vajag tikai gribēt i agruok voi vieļuok, taidā voi cytaidā veidā tū ari dabuosim. Ruodīs par daudz nūdruozta frāze i pi tam vēļ apaugus ar banalitati? Moš, bet moš ir vērts pasavērt dziļuok, voi apakšā nav kuorteigs pamats.

Sovulaik muna sapynu zeme beja Itāleja. Eisti naatguodoju deļ kuo, bet īspiejams, ka sajutu saikni sova vuorda dieļ. Moš vīnkuorši beju sasavārus kinys, biļdis, a moš kartis… Tod guoja laiks, kod saprotu, ka gribu dzeivuot Latgolā, bet dūma par kaidu cytu zemi vysleidza nazkur palyka.

Lobu laiku dzeivuoju Reigā, tik nedeļgolūs i breivdīnuos Preiļūs, tod Stokholmā, otkon Reigā, pa vosorom Preiļūs, Prīkuļūs, pluovuoju apleik… Nu jau kaidu laiku tikai Preiļūs, Preiļu nūvodā. Vysmoz tai vysu laiku asu dūmuojus, leidz sataiseju Preiļu nūvoda karti i drusku pasablieņuoju, pasavieru atspriekleņ… Izaruoda, dzeivoju Itālejā! Latgolys Itālejā

ite saleidzynuošonai vysim zynomais, eistais Itālejis “zuoboks”:

Uzdavums itūreiz nav nu sierejis “Atrodi 10 atšķirības”, bet gon – cik leidzeibu vari atrast! Golvonais, ka zuoboks ir saskotom, kurš kuram pateik lobuok, tys jau gaumis vaicuojums.

Tai ari dzeivē, nasaīt jau puoruok bīži pasavērt i saprast, ka niu situaceja ir taida, kaidu nazkod gribieji. Saīt tod, kod pasaver drupeit atspriekleņ.

Vita

http://geoviita.wordpress.com/