Latgolys Studentu centram Daugpilī byut!
Ituo goda 23. novembrī LgSC Daugpiļs bīdri reikova rodušū diskuseju ”Voi Daugpilī ir vajadzeigs LgSC?”, iz kuru bie aicynuoti gon LgSC asūšī bīdri, gon vysi interesenti, kurus interesej LgSC darbeiba, miseja, mierki, vierteibys i nuokūtnis redziejums.
Vokora pyrmū dali suokom ar naformaluos izgleiteibys metožu īsapazeišonuos aktivitatem. Iz diskusejom beja atguojuš cylvāki, kas LgSC dorbojas jau vairuokus godus, gon ari tī, kuri par bīdreibys aktivitatem suokuši interesētīs saleidzynūši naseņ.
Tod rodūšā veidā raudzejom atsaceit iz diskusejis svareiguokū vaicojumu– voi Daugpilī ir vajadzeigs LgSC? Taipoš ari raudzejom saprast, kū kotrs nu myusu ir gotovs pa eistam dareit, kab LgSC byutu pastuoveit spiejeigs, populars, vajadzeigs ari Daugpilī.
Tū vysu apsprīžūt i izsokūt vysus argumentus, kas beja myusu reiceibā, saprotom, ka LgSC DAUGPILĪ IR VAJADZEIGS!!! Taipoš cīši pozitivi viertejams fakts, ka vysi diskusejis dalinīki ir gotovi dūt arī sovu īguļdejumu, kab veicynuotu LgSC darbeibu. Mūsu vydā beja gon cylvāki, kuri gryb reikuot pasuocīņus, gon taidi, kuri gotovi raksteit projektus, rokstus avīzei, veiduot reklamys, kai ari dareit veļ daudz kū cytu, kab nūdrūšynuotu piļnvierteigu LgSC darbeibu.
Tyka apsprīsti arī cyti svareigi vaicojumi – par bīdreibys biroja telpom, vadeituoja dorbu, vysaidim pasuocīnim tyvuokā i tuoluokā laikā, kai ari īskicāti pīturys punkti nuokušajai sasatikšonys reizei, kurā paradzāts klauseitīs LgSC interesentis Evys prezentaceju par Latgolys viesturi i latgalīšū volūdys pareizraksteibu. Taipoš LgSC bīdrs – Dagneja stuosteis par bīdreibys snāgtojom prīšrūceibom, par sevis atteisteišonu i vuiceišonūs, par sovu ideju, projektu realizeišonu, dorbojūtīs navaļstiskā organizacejā.
Ja Tevi interesej vyss, kas saisteits ar Latgolu, latgalīšu kultūru i volūdu, bet Tu veļ naesi īsasaistiejs LgSC darbeibā, tod drūši atej, pasaver iz vītys, kai nūteik sarunys, ideju radeišona, diskusejis, i pīsavīnoj myusu rodūšajai i atraktivajai LgSC saimei! I, kab byutu drūšuok i jautruok, pagiun leidza kaidu leidzeigi dūmojūšu draugu!
Cytu reizi sasateikam 29.11.2011., plkst. 17:00, Daugpilī Parādis īlis 11 „koju” 15. ustobeņā (pajem leidza kaidu dokumenti, kū atstuot dežurantei)!
LgSC praktikante DU studente Agnese
