Sirds ar sirdi runojās caur RUDINI 2011
Da 17. decembram Latgolys Kulturviesturis muzejā (3. stuova zalā, Atbreivuošonys alejā 102, Rēzeknē) var apsavērt Latgolys muokslinīku dorbu izstuodi „Rudiņs 2011”, kur kailums caur dobu, cylvākim, jiutom i dūmom uzrunoj sevkura cylvāka sirdi i aizvad jū puordūmu lidojumūs.
Īejūt izstuodē, rūnās pacyluoteibys sajiuta – sirds ar sirdi runojās caur kruosom, tālim, dobu i muzyku, i kotru apmaklātuoju sovaiduok raudzej īskaut kailuma trauslumā i spākā. Rudiņs kailums dobā atsaspūgoļoj caur snīga boltumu, kailums cylvākūs – caur kautreiguma rūbežu jaukšonu i naīvāruošonu.
Izstuodis atkluošonā muzeja direktore Anastasija Strauta, raksturojūt „Rudiņs” izstuožu viesturis gaitu i atzeimejūt izstuodis nūzeimi jaunīšu i pīredziejušu muokslinīku vydā, sevkuru uzrunuoja ar Bībelis vuordim: „Staiguosim gaismā!”
I ruodīs, ka taišni rudinī itys gaismys myrdzums staroj gleznuos, myusu piļsātā i Latvejā. Kai atzyna muokslinīki, cylvāks ar skaistuma sajiutu sasatīkās jau nu dzimšonys, tei uzplaukst, kod pyrmū raizi rūkā pajem ūtu i suok zeimēt, i tod tei turpyna zīdēt bezgaleigi. Rudiņs ir laiks, kod vysi procesi tūp lānuoki, nūslāgtuoki, bet gleznys atguodynoj tū, ka dzeive turpynojās.
Gleznys pīsaista ar sovu kūšumu i kruosu daudzveideibu, kruosu rūtalis saistuos ar rudiņs rūtaļom dobā i ar sajiutom cylvāku siržuos. Tielnīceibys i keramikys dorbūs vāruojams napuorspiejams radūšums, kurs apmeklietuojus īskauj dziļuokā puordūmu lidojumā. Tekstildorbūs var īraudzēt rudiņs cykliskuma maiņu dobā, kruosu gammys tūp dryumuokys, pelieceiguokys.
Kas uzrunuos tīši Tevi? Atej i ļauj sovai sirdei runuot ar rudini!
Izstuode atvārta: Ūtardiņ, trešdiņ, caturtdiņ, pīktdiņ – 10:00-17:00; Sastdiņ – 10:00-16:00; Svātdiņ, pyrmudiņ – slāgta.
Īejis moksa: školānim i studentim Ls 0,20; pīaugušajim Ls 0,40; pyrmškolys vacuma bārnim – breiva.
Sagataveja:
Ilona Kablanova, Rēzeknis Augstškolys „Filologeja” 3. kursa studente
Maija Upeniece, LKM sabīdriskū vaicuojumu i reklamys specialiste
Karteņā: Inga Onževa “Rudiņa kailums” (Foto: A. Bondarenko)
