Jaunuo goda reitā

Fraņcs Kemps

Iz Jaunu godu

Vasali, latvīši, vasali, bruoli,
Jaunajā, laimeigajā godā!
Sveicynu vysus, kas dorbūs, kas vuorgūs,
Sveicynu džeibstūšūs bodā.
Celitēs, bruoli, nu mīga, nu tymsa:
Dzeive pa tymsu ir gryuta.
Veritēs! Gaisma jau ausa, un sauleite
Lobu mums reitu jau syuta!
Atverit steigdami durovys vaļā,
Lai gaisma skrīn ustobuos īkšā,
Lai radzam, cik malni ir ustobu styuri,
Cik dorba, cik pyuļu vēļ prīkšā!
Tei gaisma, tei sauleite, kuru mes gaidom,
Ir gudreibys, zineibys spāks;
Tuos ustobas malnys – ir tymsuši pruoti,
Nu kura vyss ļaunums, vyss grāks!
Pi dorba tod, bruoli, vīns ūtru lai saucam,
Pi dorba – ar gaismu un pruotu!
Vīnuvīt, drūši, ar paleigu kotram,
Kas pīkusis pusceļā stuotu.
Tik tūlaik, kod vīnuvīt struoduosim vysi,
Atīs mums lobuoki godi,
Byus dīnišķa maize, byus gudreiba pruotā,
Byus aizmērsti vuorgi un bodi.

1905

.

Ontons Slišāns

Jaungoda reitā

Zylgona gaisma šū pasauli puornam.
Sveist lūgi, i kūki sormoj,
A pamale tuolejuo meža īlūcē
Ašņuota aizalej…

Sirds sovaidā rytumā kryutīs zvona,
Dvēsele spuornūs ceļās
I laižās Dīva vaļsteibā īsalyukuot
Ar breinuma pylnom acim…

Zylgona gaisma šū pasauli puornam.
Pruots dūmu kaļ saullākta ēzē
I īlīk namīru kotrā muskulu škīdrā
I sapruota nervu šyunā…

1994

.

Augusts Egluojs

Otkon zīma

Otkon zīma, otkon snīgā boltā
Īgrymst lauki, muojis, īgrymst syls,
Kotrys kūks mirdz sormys rūtā stoltā
Tai kai puosokā pi karaļmeitys piļs.

Līkās maņ, ka zīd tān vysur kirši,
Zīdi bolti vysys uoris kluoj,
Snīgā aizsnauž seikī syla virši,
Spāku jaunai vosorai tī kruoj.

Žygluo vuovereite puorlāc kūkūs,
Zalta čīkureņu meklejūt,
Zeileite vēļ lidoj slaidūs lūkūs,
Boltū irbeiti redz lākojūt.

Zīma, zīma… mīrs un boltais klusums
Kotru osnu, kotru sakni sadz.
Skaistus sapņus syuta zvaigžņu tyvums,
Lai tūs dzejnīki un bārni redz.

.

Roberts Mūks

Jauna dīna

Kuop nu dabasim kai sudobruota vyzma,
Kūku golūs saulis gaisma tveikst;
Jauna dīna jaunu sapni zyna.
Tikai klusumā jauns breinums izplaukt dreikst.

Dīnys breinums! Vāsma tuoli dzidra –
Acis plašuok, cītū sirdi ver!
Lai kai nabejušūs dīnu veinu
Tovys lyupys reita mirkļus dzer.

Raisuos skots nu putekļainom kuojom,
Bolti stori tymsuos dīnys glauž;
Zynu drūšs niu – dziļūs nakšu autūs
Jaunys dīnys breinums paslāpts snauž.

1992

Print Friendly, PDF & Email

Kalenders

Feb
22
Cat
10:00 Seminars “Konfesionālās attiecīb... @ Latvejis Universitatis Latvejis viesturis instituts
Seminars “Konfesionālās attiecīb... @ Latvejis Universitatis Latvejis viesturis instituts
Feb 22 @ 10:00 – 12:00
22. februarī 10.00 stuņdēs kluotīnē, Kalpaka bulvarī 4, 108. telpā nūtiks seminars LU Latvejis viesturis instituta akademiskuo omota pretendentim. Tymā tiks snāgts ziņuojums par īprīšk sagataveitu temu.   Seminara programa: 1. Tatjana Bogdanoviča. “Konfesionālās attiecības[...]
Feb
23
Pīk
18:00 Ūtrais čangaļu saīts ci latgalīš... @ Ūzulainis tautys noms
Ūtrais čangaļu saīts ci latgalīš... @ Ūzulainis tautys noms
Feb 23 @ 18:00 – 23:00
23. februarī nu 18.00 da 23.00 stuņžu Ūzulainis tautys nomā nūtiks ūtrais “Čangaļu saīts ci latgalīšu olimpiade”, aicynojūt iz prīceigu i gordu laika pavadeišonu latgaliskā atmosferā. Tei nav tipiska olimpiade, jo tamā varēs: pasasmīt par[...]