Konkurss veļteits Latgolys nūvoda folklorys vuocieju aktiviziešonai i Ontona Slišāna dzeiviszinis pīminiešonai. Konkursa devīze ir Ontona Slišāna saceitī vuordi: „Navaicojit, kam tys vyss vajadzeigs! Kotra darbeiba, kas veļ nūstyn apsyunojūšu akmini, lai tyktu palaista breiveibā dzeiveiba, kureimū tys pīmīdzs pošā juos plaukumā, ir cīši, cīši vajadzeiga.” Konkursa mierkis: apzynuot i atbaļsteit Latgolys nūvoda ļauds, kas vuoc, popularizej i sagloboj Latgolys folkloru sevkurā izpausmē. Itys konkurss motivēja i īdrūsynuoja turpynuot Ontona Slišāna īsuoktū dorbu. Projekta idejis iniciatore i vadeituoja ir Ruta Cybule. Piec Ontona Slišāna aizīšonys myužeibā juo vuordus: –„Muns dzeivis aizdavums ir īsaisteit, īsaisteit arviņ vaira”, puordūmuoja ar cytu nūzeimi i saprota, ka taišni taids pats ir ari juos aicynuojums, deļtuo topa konkurss „Apleicīne”.

Pyrmajā konkursā tyka īsnīgti septeni dorbi. Konkursa nūslāguma pasuocīnī 28. decembrī Ruta Cybule atzyna, ka uzskota, ka pyrmais konkurss ir īsadevs. Jai ir lela prīca, ka dorbi īsnīgti nu treis vītom: Rēzeknis, Vileks i Bolvu nūvodim, kai ari prīca, ka vīnu dorbu īsnīdze bārni – meita Māreite Slišāne, tai aplīcynojūt, ka Ontona Slišāna dzeivis dorbu turpynuos ari juo saime. Konkursā īsnīgtī dorbi beja: Ilonys Bukšys dorbs par Vileks tautys dzīšmu teicieju i dzīduotuoju Annu Prancāni, Rēzeknis Augstškolys studentu kūpys folklorys vuokums, Lindys Veitūlys Tilžys pusis dzīšmu apkūpuojums „Sakasneiši”, Bieržpiļa pogosta bibliotekaris Annys Grīstenis folklorys apkūpuojums par kaidu cytu sova pogosta Annu Grīsteņu, Brīžucīma pamatškolys latgalīšu puļceņa „Otuls” skatejums iz sova pogosta folklorys boguoteibom, Māreitis Slišānis Upeitis cīma folklorys materiali i boguoteigs lokaluos folklorys vuokums nu Rēzeknis bīdreibys ESTO.

Īsnīgtūs dorbus viertēja Anna Rancāne, Latgolys regionaluos televizejis Ziņu dīnasta vadeituoja, Ilga Šuplinska, Rēzeknis Augstškolys asociātuo profesore, i dzejnīka dāls Andris Slišāns, Upeitis Tautys noma vadeituojs. Augstuokū nūviertiejumu īgiva Rēzeknis bīdreibys ESTO konkursam īsnīgtais materials i Lindys Veitūlys vuokums „Sakasneiši”.

Konkursu atbaļsteja i tuo bolvu fondu nūdrūšynuoja Vaļsts kulturkapitala fonda Latgolys projektu konkursu daškeirums, Bolvu nūvoda dūmis i Vileks nūvoda dūmis finansiejums. Konkursa naudys bolvys pasnīdze Bolvu nūvoda dūmis prīšksādātuojs Andris Kazinovskis, Vileks nūvoda dūmis prīšksādātuojs Sergejs Maksimovs i Bolvu nūvoda Centraluos bibliotekys direktore Ruta Cybule.

Koč ari itys beja pyrmais konkurss, dalinīki i pasuocīnī kluotasūšī nasašaubeja, ka ari cytus godus tiks organizāts itaids pasuocīņs – kai atzyna žurejis lūcekle, Rēzeknis Augstškolys asociātuo profesore Ilga Šuplinska, informacejis folklorys pietejumim byus gona vēļ vysmoz desmit godim.

Teksts: Vineta Zeltkalne, sadarbeibā ar Andri Slišānu i informaceja nu Bolvu nūvoda Centraluos bibliotekys olūtim

Kartenis: Bolvu nūvoda Centraluo biblioteka
.