.

Golvonī bīdreibys izveidis mierči ir Latgolys īdzeivuotuoju tīseibu aizsardzeiba i iņterešu puorstuovnīceiba. Kab sasnīgtu itūs mierčus kai ari panuoktu uzlobuojumus dažaiduos sabīdreibai byutiskuos jūmuos, bīdreibā leidzdorbojās dažaidu profeseju puorstuovi i vairuoku jūmu eksperti: uzjiemieji, lauksaimnīki, pošvaļdeibu puorstuovi, kulturys darbinīki, izgleiteibys sferys puorstuovi, medicinys darbinīki i c. Bīdreibys mierčs ir vīnuot vysu sabīdreibai byutiskū jūmu puorstuovus, kab kūpeigim spākim vairuotu lobkluojeibu, nūvieršūt nareši sastūpomuos problemys, ar kurom sasaskorom kasdīnā dorūt sovu dorbu.

.
Pošu šaļti sovu atbolstu i gataveibu leidzdorbuotīs ir paudušs vairuoki pazeistami i sabīdriski aktivi cylvāki: Teņs Bikovskis („Latgolys radeja”), Daiņs Mjartāns (tradicionaluos kulturys centrs „Latgaļu sāta”), Andris Zīmeļs (grupa „Zenīts”), Normunds Līpeņš (duets „Inga i Normunds”), Jurs Ostrovskis (grupa „Patrioti.lg”), Roberts Joksts (uzjiemiejs), Andris Slišāns (kulturys darbinīks i zemnīks) i c.

.
Sovu darbeibu bīdreiba aizsuoc ar aktualu viestuli LR 11. Saeimys deputatam Juram Viļumam, kurā teik atguodynuots par Latgolys īdzeivuotuoju primarim i aktualim vaicuojumim, kai ari deputata sūlejumu puorstuovēt sova nūvoda vālātuoju iņteresis (viertīs zamuok).

.
Jebkurs mierčs ir sasnīdzams kūpeigā i pošaizlīdzeigā dorbā, deļtuo bīdreiba „Latgolys patrioti” aicynoj leidzdorbuotīs sevkuru, kurs gryb snīgt sovu īguļdejumu Latgolys atteisteibā! Kod tod, ka ni tāņ? Kurs cyts, ka ne mes?

.
Vaira informacejis i dasaceišona, rokstūt iz e-postu: patrioti_lg@inbox.lv
Dzeivuosim, struoduosim i paleidzēsim myusu Latgolai!

.

Atkluotuo viestule LR 11. Saeimys deputatam Juram Viļumam:

.

A.gūd. J.Viļuma kungs!

Pādejuo laika nūtykumi paruoda, ka vaļstī ir aktuals volūdys vaicuojums! Zamuškā pasarakstejušs uzskota, ka tys naatbiļst Latgolys sabīdreibys patīsajom interesem, taišni jau tuos sabīdreibys dalis, kura rauga izdzeivuot (na dzeivuot) ar minimalū penseju, iztikys minimumu 180 Ls i tt. Paraleli volūdys vaicuojumam, Latgolā, kur ir augstuokais bezdorba leimeņs Latvejā, kur cīmi palīk arviņ pūstuoki deļtuo, ka īdzeivuotuoji dorba mekliejumūs brauc paceli iz Angleju ci Īreju, kur ari īsavuica cytys volūdys i īsadzeivoj svešuos mentalitatis sabīdreibā. Tūs jaunīšus, kuri aizbrauc, navar kritizēt, deļtuo ka jī nagryb struoduot pošvaļdeibu programmuos, sajamūt 100 Ls mienesī, ci kaidā gaterī, kur olgu moksoj kuverūs!

Latgola nav Latvejis suopu buoriņs ci nūmale, bet myusu nūvodam ir vajadzeiga speciala atteisteibys programa kai Latvejis i ari Eiropys Savīneibys austrumu rūbežai. Jius aktivai īsastuojat par bīdreibys „Latgolys Saeima” izveiduošonu. Tei ir bīdreiba, kas par sovu dorbu mierkim izvierzeja sekmēt Latgolys administrativuo regiona izveiduošonu, nūdrūšynuot kvalitativu diskuseju storp sabīdriskajom organizacejom, pošvaļdeibom, uzjiemejim, vaļsts īstuodem i cytim, kūpeiguo redzīņa puorstuoviešonu, latgalīšu volūdys, kulturys i socialekonomiskūs interešu aizstuoviešonu, bet leidz itam laikam „Latgolys Saeima” ir apsarūbežuojuse viņ ar volūdys vaicuojuma rysynuošonu! Vairuoki organizacejis bīdri apstyprynuojuši ar sovu dorbu, ka volūda ir primarais.

Laika šaļtī storp parokstu vuokšonu i referendumu volūdys vaicuojums palics jiuteigs, myusu bīdri īsastuoja diskusejuos ar krīvvolūdeigajim (i na viņ Latgolā) par latvīšu un latgalīšu volūdu, i secynuojom ‒ ka Latgolys cylvākim byutu īspieja gūdeigā dorbā, nūmoksojūt nūdūkļus, nūpeļneit myusu deputatu un īriedņu olgys, ka myusu pensionari sajimtu pensejis, kab piec riekinu nūmoksys i medikamentu īguodis palyktu ari naudeņa dzeivei (a na izdzeivuošonai, cytim ari tuo nav), ka Latgolā byutu atteisteitys ražūtnis, nūdrūšynuotys dorba vītys ar socialajom garantejom i olgom, kas napazamoj cylvāku, tod leluokuo daļa byutu gotovi palikt ite i pat vaira, braukt iz myusu nūvodu i vuiceit latgalīšu volūdu.

Jius struodojat Nacionaluo atteisteibys plana izstruodis i īvīsšonys uzraudzeibys komisejā, kai ari Vaļsts puorvaļdis i pošvaļdeibu komisejā, kaidus vaicuojumus vierzejat kai prioritatis, kai puorstuovit apgobolu, nu kura tykot īvālāts?

Nazkod Artis Pabriks (http://www.tvnet.lv/zinas/viedokli/368152-apabriks_par_100_latiem_strada_tikai_mulki ), Jiusu dorba bīdrs nu koalicejis partejis, atsaļuove pasaceit, ka par 100 Ls struodoj viņ duraki, zynūt, ka ar taidu summu rauga nūdrūšynuot sovu dzeivi leluokuo sabīdreibys daļa, voi Jius raudzejot vierstīs pret taidim izteicīnim?

Jiusu puorstuoveituo Zatlera reformu parteja pyrms vieliešonom sūleja dabasu mannu, bet piec vieliešonom aizmiersa sūleitū. Nuokamuo goda budžets pījimts, bet iz kuo riekina? Nūdūkli natyka mozynuoti, olgys deputatim sasaglobuoja, kaidys beja leidz šam, bet leluokajai sabīdreibys daļai kulduos šviļpoj viejs.

Sovā laikā Jius bejot Dagdys nūvoda dūmis deputats i lobuok par cytim zynit situaceju nūvodā. Pasokit gūdeigi i objektivi, kaidys īspiejis taidā nūvodā ir dorba spiejeigam cylvākam? Ka asat īvālāts par Saeimys deputatu, voi nabyutu laiks suokt aktivu darbeibu i risynuot leluokuos sabīdreibys dalis problemys?

Portalā gudrasgalvas.lv Jius uzsvieret, ka prioritate ir Latgolys atteisteiba i interešu aizstuoviešona (ekonomika, kultura, volūda, izgleiteiba, pošvaļdeibys i NVO), kur tod palyka sūlejumi? Uzsvieret ari, ka juouztur saikne ar vālātuojim, deļtuo ari aicynojam Jius kai īvālātū deputatu nu Latgolys nūvoda suokt struoduot i ar lykumprojektim raudzeit puorstuovēt sabīdreibys interesis. Lels givums vysai sabīdreibai byutu, ka Saeima atbaļsteitu (ka ari naatbaļsteitu, tod vysmoz byutu kaids, kas tuos interesis vierzej):

–    Birokratiskuo aparata mozynuošona;
–    Kriminaluos i administrativuos atbiļdeibys īvīsšona par pīnuokomu napiļdeišonu ci naatbiļsteibu omotam deputatim i īriednim;
–    Deputatu i īriedņu olgu pīleidzynuošona iztikys minimumam (deļtuo ka poši deputati nūsaceja sabīdreibai iztikys minimumu 180 Ls) ‒ paruodit ar pīmāru iz sevis, ka tys realai, varbyut ari atsataiseis acs iz aktualuom problemom, ar kū sabīdreiba sadzeivoj vysu laiku.

Voi asat gotovs atbaļsteit sabīdreibys interesis, kai sūlejot pyrms vieliešonom?

Patīsā cīneibā i ar cereibu iz sadarbeibu!

Bīdreiba „Latgolys patrioti”