Anita Mileika

Jaunuokais syutejums nu latgalīšu ailineicys – Anitys Mileikys (1987). Drupeit erotiska pīsitīņa latgaliskuos ailēs.

.

#^#

iz vīna suona guļ jei
iz ūtra — jis.

jai nu kolhoza laikim salauztys rūkys
naredziesi naticiesi.

tūreiz jei bļuove kai balalaika —

salauze rūkys.
svīžūt molku sovā gunkurā.

.

#^#

muna mute irā kruosņs.
sylta i smoga nasta iz tovom vacumdīnom.

.

#^#

fotokarteņā jauna sīvīte.
malnys skrūpstys i boltys veseleigys sīkolys.

nūfotografeita pyrms černobilis.

.

#^#

saule paver sovu muti a tī sorkons mads storp ilknim guļ veirīts pyrmū reizi apsamolda mežā. zīmā. bosom kuojom.
kū dareit? nu nikuo! juoīt iz prīšku! div nedelis guoja!

pa tū laiku juo sīva prūtams atroda ļubovnīku. i dabova maločnicu. i aijajai kū dareit? nu nikuo! juoīt iz prīšku! div nedelis guoja!

jis — nu meža
jei — mežā

aijajai

dzymumdzeive — puosoka bez ļubesteibys.

.

#^#

piļsātys dzeivūklī attaisu balkonu
i nikas nanūteik.

zīma stuov iz munim kuoju pierstim
i nikas nanūteik
ni maņ otkon suop ni nīz

vysā kūpumā nu molys izaveru laimeigs.

divreiz nedeļā atīt muna trokuo sīvīte.

sūleju ženeitīs.

.

#^#

piec kotra spontana aborta jei atīt gostūs.

verās pa munu lūgu kur aizīt starks.

myusim nikod tai i nasaīt parunuot.

toļka papeipuot zylū winstonu.

vokorā jei vīnkuorši nūmozguos kuojstarpi.

kai nūtyka tai nūtyka.

.

Cytys Anitys ailenis meklej: https://www.lakuga.lv/2011/11/04/mileika/

.

Karteņa: foto Edeite