Pasuocīna mierki ir popularizēt myusdīnu folkloru kai sabīdreibys kulturys sastuovdaļu, veicynuot tautys tradiceju saglobuošonu i puormontuojameibys procesu, kai ari nūdrūšynuot izgleituošonuos i pīredzis apmainis procesu storp ziņgeituojim i stuostnīkim. „Ziņgeituoju i stuostnīku vokorā” pīsadola latvīšu i cyttautu ziņģu i stuostomuos folklorys izpiļdeituoji.

Ituo, jubilejis goda, pasuocīnī dalinīki ir aicynuoti izpiļdeit sev pošim vystyvuokuos, meiluokuos i skaistuokuos ziņgis i stuostus.

Kas tiks stuosteits? Varbyut tī byus interesanti, smīkleigi, pa pusei nūpītni atgadejumi gūdūs i dažaiduos vīseibuos, varbyut eimūt iz sātu nu vīseibom rodīs kaids interesants stuosts, varbyut ir satikti sovaidi ļauds, par kurim ir stuosts; varbyut kaids kūrzemnīks, reidzinīks ci vidzemnīks ir nūklivs kaiduos vīseibuos Latgolā i atsagadejs koc kas jūceigs i sovaids. Juopīmiņ, ka lobs stuostnīks ir tys, kurs pots nu nīka „izpyuss” lelu nūtykumu!

Vokora gaitā paradzāts: ziņgis i stuosti, sveikšona i bolvys, kuoju izlūceišona dančūs kūpā ar Viļānu KN lauku kapelys „Bumburneicys” dāmom i pasuocīņa dalinīku muzicejūšom grupom.

Paradzāts izdūt ari jubilejis informativū izdavumu „Ziņgis i stuosti 2003-2012” par projektu 10 godu garumā, kurymā tiks apkūpuotys ap 25 ziņgem i 10 stuosti.

Vaira viertīs: www.muzykanti.lv

.