Latgalīšu rokmuzykanti Australejā

Anna Briška, grupys „Dabasu Durovys” menedžments

Pārn decembra ūtrā pusē iz Australeju devēs popularu latgalīšu rokgrupu muzykantu izlase, lai apcīmuotum Australejā dzeivojūšūs latvīšu jaunīšus i īprīcynuotum ar eipaši gatavuotu latgalīšu muzykys koncertprogramu.

.
Suokūtneji uzaicynuojumu pīsadaleit jaunīšu pasuokumūs Australejā sajēme latgalīšu rokgrupa „Dabasu Durovys”, tūmār tolkā tyka aicynuoti ari cytu grupu dalinīki, izveidojūt muzykalu projektu „DD@AUS”. Tuos sastuovā beja „Dabasu Durovu” sirds i dvēsele Arņs Slobožanins (gitara, bolss), Ugis Vylcāns (bungys), menedžere i latgalīšu folklorys zynuotuoja Anna Briška (vijūle), Jurs Vucāns (gitara, bolss) nu grupys „Likteneigais pagrīzīņs iz Vainovu”, Alvis Bernāns (gitara, bolss) nu grupys „Green Novice”. Muzykantim pīsabīdrova ari latgalīšu kulturys popularizātuojs, grupys draugs Jurs Viļums, kurš Australejis latvīšim stuosteja par Latgali i latgalīšim, kai ari fotografs i pīredziejs ceļuotuojs Armīns Bernāns.

.
„DD@AUS” jēme daleibu divejūs Australejis jaunīšim nūzeimeigūs pasuokumūs – nu 26. da 31.decembram 33. Jaunatnis dīnuos Sidnejā, nu 4. da 13. janvaram – jaunīšu vosorys nūmetnē ci Vosorys vydsškolā Adelaidys apleicīnē.

Golvonī nūsacejumi kengurzemē

Piec divu dīnu ceļuojuma nu Latvejis iz Australeju (kūpejais treis lidmašynuos pavadeitais laiks – 23 stuņdis), pyrmais pīturys punkts beja Melburna, kur grupys sagaideituoji Dāvids i Markus īpazeistynova gon ar svareiguokajim aklimatizacejis lykumim, gon tyvuokom i tuoluokom vītom. Svareiguokī punkti:
•    Lai ari ībrauc Australejā naktī ci agri nu reita, īt gulēt var tikai tuos dīnys vokorā.
•    Saulis krems ir juolītoj obligati, ja viņ nagribi kliut sorkons kai viezs.
•    Olu pierc kastēs voi vysmoz sešpakuos, pa vīnai butelkai saīt cīši puormoksuot.
•    Iz grila captu gaļu ād bez kečupa.
•    Smukys meitinis iz īlom nasamātoj.
•    Haizivs Melburnys pludmalē uzbryuk cylvākim videji vīnu reizi godā.
•    Vyslātuok i vysvairuok var paēst kīnīšu āstuvēs.
.
Jaunatnis dīnys – mozī Dzīšmusvātki!

33. Jaunatnis dīnys Sidnejā beja centralais pasuocīņs na viņ projekta „DD@AUS” dalinīkim, bet ari Australejis latvīšu jaunīšim, kurim itaids nūtykums ir tikai reizi divejūs godūs, i kotru reizi kaidā cytā vītā – Sidnejā, Adelaidā ci Melburnā (ituos piļsātys ir izvītuotys apmāram taidā pošā attuolumā kai attīceigi Rēzekne, Berlīne, Krakova). Festivals ilgst gondreiž nedeļu, i tī ir gostu nu Latvejis koncerts, Australejis latvīšu jaunīšu i jūs grupu koncerts, tautys deju koncerts, kai ari daņči, bals i apkūleibys piec koncertim, sasadzīduošonys.

.
Nu Latvejis gostu statusā itymā reizē koncertēja „Dabasu Durovu” projekts „DD@AUS”, „The Baltics” (grupys „Cosmos” i ansambļa „Latvian Voices” dalinīku kūpprojekts) i Latgolys kūklis virtuoze Laima Jansone. Tautys deju koncertā sadoncova reizē latvīšu deju grupys nu Sidnejis, Adelaidys, Melburnys, Kanberys, kai ari Sidnejis igauņu deju kūpa.

.
Interesanti beja klauseitīs Australejis latvīšu jaunīšu koncertu, kur beja gon individuali izpiļdeituoji, gon grupys. Pateikami beja dzērdēt originalskaņdorbus, improvizacejis i dažaidu tautysdzīšmu apdaris. Ir uzsuokti dorbi, lai ari Latgolā 2013.godā varātum baudeit Australejis latvīšu jaunīšu koncertprogramu.

.
Juoatzeimoj, ka latgalīšu tautysdzīsmis ir lelā gūdā turātys, dažaidūs pasuocīņūs dzērdējom „Rūžeņu”, „Tuoli dzeivoj muna meiluo”, „Aiz azara malni meži”, „Padarieju aluteņu” i c. Tys lelā mārā ir skaidrojams ar tū, ka jau vairuokys reizis leidz šam Australejā ir gastejs Artūrs Uškāns, kurš ir izdarejs lelu dorbu, vuicūt latgalīšu tautysdzīsmis i daņčus.

.
Jaunatnis dīnu nūslāgumā nūtyka jaungoda bals Havaju stilā, aizsuocūt jaunū godu tropiskys paradīzis jautrajuos nūskaņuos.
Piec festivala „DD@AUS” veļ puors dīnys pagasteja pi vīsmīleigajim jaunīšim Sidnejā, apsaverūt īvārojamys vītys, dūdūtīs dobā – tipiskā Australejis mežā – bušā.
.
Vosorys vydsškola – iztureibys puorbaude

Ceļuojuma ūtrā daļā „DD@AUS” devēs iz Adelaidys apleicīni, kur jēme daleibu jaunīšu nūmetnē – Vosorys vydsškolā, kur vaļdeja eistyn latvisks gors. Nūmetnis kotra dīna aizasuoce ar Svātūs Rokstu lasejumu, lyugšonu i svineigu Latvejis karūga paceļšonu. Reita pusē jaunīšim beja dažaidys vuiceibu stuņdis – latvīšu volūda, dzīduošona, viesture, geografeja, ticeibys vuiceiba. Piec pušdīņu breivajā laikā vysi devēs i mauduot, i giut viļņus iz pludmali. Eipašā gūdā beja ari kūra mieginuojumi kotru vokoru.
Lela daļa vokora muzykalūs aktivitāšu beja ari „DD@AUS” puorziņā – tyka vuiceita muziciešona grupā, spālātys balleitis, daņču vokors ci večerinka.

.
Vosorys vydsškolā beja puorbaudejumi ari fiziskajai iztureibai. Vīnā nu vokorim nūtyka legendarais „Pārkiuneiša maratons”. Aizdavums nūmetnis dalinīkim – sasaceņst, kurš puors iļgok nūdoncuos pārkiuņdanci, i muzykantim ari juotur leidza. Itymā godā stypruokais puors izturēja 1 stuņdi i 18 minotys! Veļ cytā dīnā tyka reikuota olimpiade, kur pīsadaleja i finālā spielejūt pret nūmetnis školuotuojim uzvaru izceineja ari „DD@AUS”!

.
Ar lusteigu balleiti muzykalais projekts „DD@AUS” atsavasalova nu Vosorys vydsškolys dalinīnīkim, školuotuojim i organizātuojim i devēs jautrā ceļā iz sātu.

Kartenis: Armīns Bernāns, grupys arhivs.

.

Print Friendly, PDF & Email

Komentari

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]